Eftir tölu­verða gengislækkun í júlímánuði fór hluta­bréfa­verð Icelandair aftur upp á við í við­skiptum dagsins.

Gengi Icelandair hækkaði um rúm 2% og var dagsloka­gengið 1,06 krónur á hlut. þ

Gengi flug­félagsins stóð í 1,28 krónum á hlut um miðjan mánuð áður en félagið birti árs­hluta­upp­gjör fyrir annan árs­fjórðung. Fjár­festar tóku ekki vel í upp­gjörið og hefur gengið verið á stöðugri niður­leið síðan þá.

Gengi Icelandair hefur nú hækkað tvo viðskiptadaga í röð en slíkt hefur ekki gerst frá því að félagið birti uppgjör um miðjan mánuð.

Hluta­bréfa­verð Icelandair hefur lækkað um tæp 28% á árinu en hækkað um 22% síðastliðið ár.

Gengi fasteignafélagsins Heima hækkaði einnig í viðskiptum dagsins. Dagslokagengið var 38,4 krónur á hlut eftir tæplega 1,6% hækkun í 120 milljón króna viðskiptum.

Hlutabréfaverð Alvotech lækkaði um rúm 3% í viðskiptum dagsins. Dagslokagengi félagsins var 1.150 krónur eftir 200 milljón króna viðskipti í dag.

Gengi Play lækkaði einnig um 3% í örviðskiptum. Dagslokagengi Play var 0,45 krónur.

Úrvalsvísitalan hækkaði um 0,21% og var heildarvelta á markaði 2,4 milljarðar.