Hlutabréfaverð Play lækkaði um 23% í viðskiptum dagsins og var dagslokagengið 0,46 krónur. Mun það vera lægsta gengi í sögu félagsins en það stóð lengi vel í 0,39 krónum innan dags.
Rétt fyrir lokun markaða fór gengið úr 0,39 krónum upp í 0,46 í nokkrum örviðskiptum.
Markaðsvirði Play er því komið undir 1 milljarð í fyrsta sinn í sögu félagsins. Á núverandi verðlagi hefur Play alls sótt um 21 milljarð króna í nýtt hlutafé frá fyrsta rekstrarárinu 2021.
Þrátt fyrir þessa miklu lækkun er félagið þó langt frá því að vera í brottfallshættu samkvæmt skráningarreglum Kauphallarinnar.
Samkvæmt upplýsingum frá Nasdaq færist félag á athugunarlista ef markaðsvirði þess helst undir 1 milljón evra, eða um 143 milljónum króna á núverandi gengi, til lengri tíma.
Enn lækkar Alvotech
Hlutabréfaverð Alvotech lækkaði um 2,3% í tæplega 198 milljón króna viðskiptum. Dagslokagengi félagsins var 1.050 krónur á hlut en gengið hefur lækkað um 40% á árinu.
Gengi Icelandair lækkaði einnig í viðskiptum dagsins og lokaði í 1,06 krónum á hlut eftir tæplega 1% lækkun.
Sýn var eina skráða félagið sem hækkaði um meira en 1% í viðskiptum dagsins. Hlutabréfaverð Sýnar hækkaði um 1,3% í 15 milljón króna viðskiptum og lokaði í 32 krónum á hlut.
Úrvalsvísitalan lækkaði um 0,36% og var heildarvelta á markaði 2 milljarðar. Af þeirri heildarveltu var 1,1 milljarða velta með bréf Íslandsbanka.
