Gistinóttum á hótelum hér á landi fjölgaði um 9,4% í júní samkvæmt bráðabirgðatölum Hagstofu Íslands.
Alls voru skráðar tæplega 534.000 gistinætur á hótelum í mánuðinum, samanborið við rúmlega 488.000 í júní í fyrra.
Fjölgunin náði til allra landshluta en mest var hún á Vesturlandi og Vestfjörðum (30,5%), Austurlandi (21,5%), Suðurnesjum (11,3%) og Suðurlandi (9,9%).
Á Norðurlandi var aukningin 6,3% og á höfuðborgarsvæðinu 5,8%. Á höfuðborgarsvæðinu fjölgaði gistinóttum um tæp 14.000 og um 32.000 í öðrum landshlutum samanlagt.
Erlendir ferðamenn stóðu undir 91% allra gistinátta á hótelum í júní, eða rúmlega 488.000, sem er 12,4% aukning frá fyrra ári. Gistinætur Íslendinga drógust hins vegar saman um 14,6% milli ára og voru tæplega 46.000.
Bandaríkjamenn voru fjölmennastir meðal gesta og fjölgaði gistinóttum þeirra um 8,4%.
Þar á eftir komu Þjóðverjar (24,4%), Bretar (19,4%) og Kínverjar (70,7%). Á fyrri helmingi ársins jukust gistinætur erlendra ferðamanna á hótelum um 5,4%, en gistinóttum Íslendinga fækkuðu um 3,2%.
Nýting hótelherbergja jókst um 7 prósentustig á landsvísu og mældist hæst á Suðurlandi (84,7%) og á höfuðborgarsvæðinu (81,6%). Mest jókst nýtingin þó á Vesturlandi og Vestfjörðum (17,8 stig) og Austurlandi (16,2 stig).
Framboð hótelherbergja breyttist lítið í júní. Mest jókst það á Vesturlandi og Vestfjörðum (2,5%) og Suðurnesjum (1,0%), en dróst saman á Austurlandi (-2,1%) og Suðurlandi (-0,9%). Alls voru 177 hótel opin í júní, með samtals 12.100 herbergi, þar af 60 hótel á höfuðborgarsvæðinu og 47 á Suðurlandi.
Þegar litið er til allra skráðra gististaða (þ.m.t. gistiheimila, tjaldsvæða og orlofshúsa) var áætlaður heildarfjöldi gistinátta í júní rúmlega 1.192.000, sem er 8,4% aukning frá fyrra ári. Rúmlega 708.000 gistinætur voru á hótelum og gistiheimilum og um 484.000 á öðrum gististöðum.
Á fyrstu sex mánuðum ársins voru alls 3.984.000 gistinætur skráðar á öllum tegundum gististaða, sem er 4,8% aukning miðað við sama tímabil í fyrra.
