Rekstur Íslandsbanka á fyrri helmingi ársins 2025 skilaði 12,4 milljarða króna hagnaði, sem jafngildir 11,1% arðsemi eigin fjár.
Arðsemin er umfram leiðbeiningar bankans fyrir árið í heild og rekstrargrundvöllurinn styrkist enn frekar á öðrum ársfjórðungi.
Íslandsbanki birti í dag uppgjör sitt fyrir annan ársfjórðung og fyrstu sex mánuði ársins 2025.
Hagnaður af rekstri á öðrum ársfjórðungi nam 7,2 milljörðum króna, sem er um 18% yfir spám greinenda. Til samanburðar hagnaðist bankinn um 5,3 milljarða króna á sama tímabili í fyrra.
Hagnaður fyrir árið hingað til er því 12,4 milljarðar, sem er aukning frá 10,7 milljörðum á fyrri hluta 2024. Arðsemi eigin fjár mælist 11,1% fyrir fyrri hluta ársins en var 9,8% á sama tímabili í fyrra.
Hreinar vaxtatekjur bankans jukust um 9% milli ára og námu 26,8 milljörðum króna á fyrri hluta ársins. Á öðrum fjórðungi einum námu þær 13,9 milljörðum króna. Vaxtamunur á fjórðungnum mældist 3,3%, sem er hærra en bæði á fyrri fjórðungi ársins og öðrum fjórðungi í fyrra.
Rekstrarkostnaður er áfram aðhaldssamur. Stjórnunarkostnaður var 14,7 milljarðar króna á fyrri hluta ársins og jókst aðeins frá fyrra ári, þegar litið er fram hjá einskiptisliðum. Kostnaðarhlutfall lækkaði úr 44,8% í 44,1%, sem endurspeglar hagræðingu í rekstri.
Á öðrum fjórðungi var hlutfallið komið niður í 41,0%, samanborið við 45,7% í fyrra.
„Óhætt er að segja að annar ársfjórðungur ársins 2025 hafi verið viðburðaríkur í rekstri Íslandsbanka. Sala ríkisins á eftirstandandi eignarhlut þess í bankanum í maímánuði gekk vel. Hún markaði tímamót í rekstri Íslandsbanka og það eru spennandi tækifæri sem gefast við slík tímamót. Þá var sérstaklega ánægjulegt að sjá mikla þátttöku almennings í útboðinu en virk þátttaka einstaklinga á hlutabréfamarkaði er stórt skref í því að auka virkni og dýpt markaðarins hér heima og fögnum við auknum umsvifum einstaklinga á verðbréfamarkaði,” segir Jón Guðni Ómarsson, bankastjóri Íslandsbanka.
Þóknanatekjur vaxa og útlán aukast
Hreinar þóknanatekjur voru 6,7 milljarðar króna á fyrri helmingi ársins, sem er 7,5% aukning frá sama tímabili í fyrra. Á öðrum fjórðungi námu þær 3,6 milljörðum króna, sem er 12,8% aukning milli ára. Fjármunatekjur voru takmarkaðar en jákvæðar á fjórðungnum, sem stendur í skörpum andstæðum við neikvæðan fjármunalið í fyrra.
Útlán til viðskiptavina jukust um 32,4 milljarða króna frá fyrsta fjórðungi og stóðu í 1.331 milljarði króna í lok júní. Innlán frá viðskiptavinum námu 966 milljörðum króna og jukust um 3,1% frá mars.
„Fram undan eru spennandi tímar og staða Íslandsbanka er afar sterk. Umfram eigið fé (CET1) bankans nam um 40 milljörðum króna í lok fjórðungsins og horfir bankinn enn til vaxtartækifæra, jafnt innri og ytri. Bankinn hóf endurkaup á eigin bréfum að nýju í byrjun júlí eftir að hafa gert hlé í lok fyrsta ársfjórðungs 2025 og ýtti þar með úr vör endurkaupum fyrir allt að 15 milljarða króna að markaðsvirði,” segir Jón Guðni.
Traust eiginfjárstaða og lítil virðisrýrnun
Eiginfjárhlutfall Íslandsbanka var 21,5% í lok annars fjórðungs og samsvarandi eiginfjárhlutfall CET1 var 18,5% – sem er 330 punktum yfir kröfum Fjármálaeftirlitsins og hærra en fjárhagslegt markmið bankans.
Virðisbreyting á fjáreignum var jákvæð um 402 milljónir króna á öðrum fjórðungi og um 399 milljónir á fyrri helmingi ársins. Áhættukostnaður útlána var neikvæður, eða -0,12%, sem þýðir að endurmat fjáreigna hefur verið til tekna fyrir bankann.
Lækkun eiginfjárhlutfalls skýrist að hluta af endurkaupaáætlun og lækkun hlutafjár, sem Seðlabankinn veitti leyfi fyrir í vor. Samhliða eru MREL-kröfur vel uppfylltar – MREL-hlutfallið stendur í 36,7%, eða 720 punktum yfir lágmarkskröfu.
