Norðurorka hf. hefur ákveðið að setja 4,54% eignarhlut sinn í Skógarböðum ehf. í opið söluferli og býður áhugasömum fjárfestum að gera tilboð í hlutinn.
Skógarböð ehf. heldur utan um samnefnt baðlón á Akureyri við rætur Vaðlaheiðar en félagið hagnaðist um 210 milljónir króna á árinu 2024 samanborið við 153 milljóna hagnað árið 2023.
Hagnaður félagsins jókst því um 37% milli ára.
Einblína á kjarnastarfsemi
Skógarböðin, sem opnuðu í maí 2022, hafa á skömmum tíma orðið einn vinsælasti áfangastaður ferðamanna á Norðurlandi.
Á síðasta ári sóttu um 150 þúsund gestir baðlónið og veltan nam tæpum milljarði króna.
Eyþór Björnsson forstjóri Norðurorku segir að félagið hafi verið stolt af því að koma að uppbyggingu Skógarbaða, en starfsemi Norðurorku snúi fyrst og fremst að rekstri veitna við Eyjafjörð og í Fnjóskadal.
Þar sem frekari uppbygging, þar á meðal bygging hótels, sé fyrirhuguð við Skógarböðin, hafi stjórn Norðurorku ákveðið að selja hlut sinn og einbeita sér að kjarnastarfsemi félagsins.
Hluturinn vel yfir 100 milljóna virði
Ein breyting varð á hluthafalista Skógarbaða í fyrra. Höldur – baðfélag ehf., systurfélag Hölds – Bílaleigu Akureyrar, seldi 10% hlut sinn í Skógarböðum fyrir 290 milljónir króna samkvæmt ársreikningi félagsins.
Söluhagnaður Hölds – baðfélags nam 240 milljónum króna.
Miðað við ofangreint var virði Skógarbaða ehf. metið á 2,9 milljarða króna í viðskiptunum.
Sé miðað við þessi viðskipti má áætla að hlutur Norðurorku sé metinn á að minnsta kosti 131 milljónir króna.
Velta Skógarbaða jókst um 200 milljónir króna, eða 25,4%, milli ára og nam 987 milljónum króna í fyrra.
Rekstrargjöld jukust um 25,3% og námu 676 milljónum. Þar af voru laun og tengd gjöld 331 milljón en ársverk voru 28, samanborið við 25 árið áður.
Rekstrarhagnaður (EBIT) félagsins fór úr 247 milljónum í 311 milljónir króna milli ára.
Eignir Skógarbaða ehf. voru bókfærðar á 1,5 milljarða króna í árslok 2024, en þar af voru fasteignir félagsins metnar á 1,2 milljarða. Eigið fé var um 831 milljón og langtímaskuldir 348 milljónir.
