Hlutabréfaverð fjölmiðla- og fjarskiptafélagsins Sýnar hefur hækkað rúm 4,4% í viðskiptum dagsins og stendur gengið í 33,4 krónum á hlut. Samsvarar það um 37% hækkun síðastliðinn mánuð en gengi félagsins hefur verið á miklu skriði undanfarnar vikur.
Sýn er nú meðal þeirra 11 skráðra félaga sem hafa hækkað á árinu en gengi bréfanna er nú tæplega 4% hærra en í ársbyrjun.
Töluverðar áskoranir hafa verið í rekstri Sýnar en í febrúarmánuði hafði gengi félagsins lækkað um ríflega helming á einu ári en tap félagsins fyrir virðisrýrnun nam 357 milljónum í fyrra.
Þann 12. júní síðastliðinn tilkynnti Sýn að Vodafone og allar sjónvarpsstöðvar Stöðvar 2 hefðu sameinast undir merkjum Sýnar.
Í byrjun þessa mánaðar tilkynnti félagið um að frá og með 1. ágúst verði línulega sjónvarpsstöðin Sýn, áður Stöð 2, í opinni dagskrá fyrir alla landsmenn, en frá og með þeim tíma mun allt efni fyrst birtast á streymisveitunni Sýn+.
Þá styttist óðum í að Sýn fari að auglýsa af fullum krafti áskrift að Sýn Sport í tilefni af því að næsta tímabil enska boltans hefst 15. ágúst næstkomandi. Fyrir rúmu ári tryggði Sýn sér sýningarrétt á enska boltanum frá tímabilinu 2025/2026 til og með tímabilinu 2027/2028.
Sýn bindir miklar vonir við að endurkoma Enska boltans leiði til töluverðrar fjölgunar viðskiptavina. Talið er að Sýn greiði á fjórða milljarð króna fyrir sýningarrétt á Enska boltanum í þrjú ár.
Sýn tilkynnti í byrjun mánaðar að pakkaáskrift að streymisveitunni Sýn+ og öllum sportrásum muni kosta 11.990 krónur á mánuði.
Sýn tapaði 344 milljónum króna eftir skatta á fyrsta ársfjórðungi, samanborið við 153 milljóna tap á sama tímabili í fyrra, en félagið birti árshlutauppgjör í byrjun maí.
Rekstrartekjur samstæðunnar á fyrsta fjórðungi drógust saman um 2,7% milli ára og námu 5.220 milljónum króna.
Félagið greindi þó frá jákvæðri þróun í kjarnastarfsemi fjarskipta, þar sem bæði tekjur og fjöldi viðskiptavina aukast á milli ársfjórðunga. Þá hafa tekjur af Stöð 2+ einnig aukist og fjöldi áskrifenda hefur aldrei verið meiri.
Eignir Sýnar voru bókfærðar á 30,8 milljarða króna í lok mars og eigið fé var um 8,3 milljarðar króna. Sýn segir að fjárhagsstaða félagsins hafi verið styrkt á fjórðungnum þegar gengið var frá framlengingu á lánalínum félagsins.
