Anna Signý Guðbjörnsdóttir hefur tekið við sem framkvæmdastjóri Kolibri. Hún er einn af eigendum fyrirtækisins og hefur setið í stjórn þess og tekur við af Skúla Valberg sem einnig er einn af meðeigendum. Skúli mun svo taka við sem stjórnarformaður Kolibri.
Kolibri var stofnað árið 2007 og er hugbúnaðar- og hönnunarfyrirtæki sem sér um hönnun, vefi, smáforrit og stafrænar lausnir.
„Anna hefur átt stóran þátt í að skapa Kolibri sérstöðu og við erum í skýjunum að fá jafn öfluga konu og Önnu Signýju til að leiða fyrirtækið. Við hjá Kolibri þökkum Skúla Valberg fyrir frábært samstarf í hlutverki framkvæmdastjóra og hlökkum til að vinna með honum áfram í stjórn félagsins,” segir Daði Ingólfsson stofnandi og stjórnarmaður.
„Hjarta mitt slær í takt við hjarta Kolibri þar sem nýsköpun og framúrskarandi stafræn hönnun og þróun hrærist"
Anna Signý hefur starfað hjá Kolibri síðan árið 2018 sem sérfræðingur í notendaupplifun. Hún er með cand.it gráðu frá IT háskólanum í Kaupmannahöfn í stafrænni hönnun og upplýsingatækni og hefur m.a. setið í stjórn Samtaka vefiðnaðarins (SVEF).
„Ég er spennt fyrir komandi tímum hjá Kolibri og er mjög þakklát fyrir traustið sem Kolibri hefur sýnt mér. Hjarta mitt slær í takt við hjarta Kolibri þar sem nýsköpun og framúrskarandi stafræn hönnun og þróun hrærist. Framundan eru spennandi tímar við að styrkja enn frekar í sessi hönnunarstúdíó Kolibri og mæta auknum áhuga á vöruþróunarteymunum okkar,” segir Anna.
