Eik fasteignafélag hf. hefur tekið upp nýtt skipurit í kjölfar skipulagsbreytinga sem gildir frá og með deginum í dag. Í kjölfar breytinganna fækkar í framkvæmdastjórn félagsins úr sjö í fjóra.
Í tilkynningu Eikar til Kauphallarinnar segir að markmið breytinganna sé að setja þjónustu við viðskiptavini í forgrunn ásamt því að einfalda og skýra boðleiðir í rekstri félagsins.
„Eik fasteignafélag vill fjárfesta með atvinnulífinu og vera öflugur bakhjarl viðskiptavina sinna við verðmætasköpun í landinu.“
Þær breytingar sem gerðar eru á skipuriti félagsins eru eftirfarandi:
- Nýtt svið, Viðskiptavinir, sem sameinar útleigu, húsumhyggju og viðskiptaþróun í eina heild. Framkvæmdastjóri sviðsins er Friðrik Ársælsson.
- Framkvæmdasvið verður áfram leitt af Guðbjarti Magnússyni.
- Upplýsingatækni félagsins færast undir Fjármálasvið, sem er leitt af Lýð H. Gunnarssyni.
- Lögfræðideild færist á skrifstofu forstjóra.
Eyjólfur og Hrönn láta af störfum
Eyjólfur Gunnarsson, sem gegnt hefur stöðu framkvæmdastjóra útleigusviðs, og Hrönn Indriðadóttir, sem verið hefur aðstoðarframkvæmdastjóri útleigusviðs, hafa látið af störfum hjá Eik.
Friðrik Ársælsson kemur nýr inn í framkvæmdastjórn, sem framkvæmdastjóri viðskiptavina. Þá færist Sturla Gunnar Eðvarðsson úr framkvæmdastjórn og tekur við sem forstöðumaður á sviði viðskiptavina.
Árni Huldar Sveinbjörnsson færist á skrifstofu forstjóra og sinnir áfram stöðu yfirlögfræðings og regluvarðar félagsins.
