Advania hefur fest kaup á Gompute sem sérhæfir sig á sviði gervigreindarinnviða og reksturs ofurtölva (HPC). Gompute var stofnað árið 2002 og hefur verið í eigu hátæknifyrirtækisins atNorth sem rekur þrjú gagnaver á Íslandi.
Gert er ráð fyrir að kaup Advania á Gompute gangi endanlega í gegn síðar á þessu ári, að því er kemur fram í fréttatilkynningu.
Kaupin á Gompute eru sögð liður í stefnu Advania á sviði gervigreindarþjónustu sem ætlað er að styðja við viðskiptavini í Norður-Evrópu.
Í síðasta mánuði var tilkynnt um kaup Advania á fyrirtækinu The AI Framework, sænsku ráðgjafafyrirtæki á sviði gervigreindar.
Í sumar tilkynnti Advania einnig um séríslenskt gervigreindarský sem fyrirtæki og stofnanir á Íslandi hafa aðgang að og geta þannig hafið sína gervigreindarvegferð og skalað eftir þörfum.
„Hagnýtingu á gervigreind vindur hratt fram hjá viðskiptavinum okkar. Kaupin á Gompute munu útvíkka þjónustuframboð Advania á sviði gervigreindar enn frekar og bjóða upp á öfluga og trygga innviði sem hafa það að markmiði að styðja við næsta fasa virðisaukningar í rekstri og nýsköpun íslenskra fyrirtækja og stofnanna,“ segir Hildur Einarsdóttir forstjóri Advania á Íslandi.
Sjóður í eigu Goldman Sachs keypti meirihluta í Advania árið 2021 og hefur fyrirtækið vaxið ört síðan. Advania samstæðan hefur keypt nokkur erlend fyrirtæki á síðustu árum, þar á meðal bresku fyrirtækin CCS Media og Servium í fyrra og breska fyrirtækið Azzure IT árið 2022.
