Kópavogsbær (A og B hluti) var rekinn með 599 milljóna króna afgangi á fyrri árshelmingi. Til samanburðar gerðu áætlanir ráð fyrir 228 milljóna halla á tímabilinu.
„Rekstur Kópavogsbæjar er áfram sterkur þrátt fyrir þráláta verðbólgu og háa vexti. Afkoman er 830 milljónum króna betri en áætlanir gerðu ráð fyrir,“ segir Ásdís Kristjánsdóttir, í uppgjörstilkynningu sveitarfélagsins.
Tekjufærðu 1,3 milljarða króna lóðagjöld
Meðal þess sem hefur jákvæð áhrif á afkomu tímabilsins er lóðaúthlutun í efri byggðum Kópavogs sem koma að hluta fram í uppgjörinu. Gert er ráð fyrir að byggingarframkvæmdir fari að hefjast.
Lóðagjöld að fjárhæð 1,3 milljarðar króna voru tekjufærð. Tekjufærslan er vegna úthlutaðra lóða þar sem búið er að þinglýsa lóðaleigusamningum og lóðin þar með komin á nafn nýs lóðarhafa.
Aftur á móti var verðbólgu og vextir hærri en gert hafði verið ráð fyrir í áætlun bæjarins. Bæjarfélagið segir að innborganir á viðskiptakröfur hafi dregist meira en áætlað var og því séu fjármagnsgjöld samstæðunnar 380 milljónum króna hærri en áætlað hafði verið.
Ásdís: Verulegt styrkleikamerki
Rekstrarniðurstaða A-hluta var jákvæð um 276 milljónir króna á fyrri helmingi ársins en áætlun gerði ráð fyrir halla að fjárhæð 304 milljónir króna.
Í tilkynningu bæjarfélagsins segir að í sögulegu samhengi falli 47-49% af skatttekjum bæjarins til á fyrri helmingi ársins og 51-53% á þeim seinni.
Veltufé frá rekstri samstæðu er rúmlega 1,7 milljarðar en framlegð samstæðu er tæplega 4,1 milljarður á misserinu, eða 13,5% af tekjum samstæðunnar. Ef framlag til lífeyrisskuldbindinga er talið með sem breytilegur kostnaður nemur hlutfall framlegðar af tekjum samstæðunnar 10,7%.
„Þá er verulegt styrkleikamerki að veltufé frá rekstri sé rúmlega 1,7 milljarður króna og endurspeglar það svigrúm sem reksturinn gefur á fyrstu sex mánuðum ársins til að standa undir framkvæmdum og afborgunum lána,“ segir Ásdís Kristjánsdóttir, bæjarstjóri Kópavogs.
„Heildarskuldir að undanskildum reiknuðum lífeyrisskuldbindingum eru að lækka um 120 milljónir króna þrátt fyrir umfangsmiklar framkvæmdir í bæjarfélaginu. Á föstu verðlagi eru heildarskuldir að lækka.“
Hún nefnir einnig að ráðist hafi verið í hagræðingaraðgerðir á árinu til að mæta kjarasamningum sem muni skila sér af meiri þunga á síðari hluta ársins.
Stofnfjárfestingar á tímabilinu voru um 4,4 milljarðar og munar þar mestu um byggingu nýs Barnaskóla Kársness sem tók til starfa í upphafi vikunnar.
Heildarskuldir samstæðunnar hækka um 314 milljónir króna á tímabilinu, en þar af hækkar reiknuð lífeyrisskuldbinding um rúmar 430 milljónir króna. Bent er á að heildarskuldir lækki á föstu verðlagi.
