Útgáfufélagið Torg hefur ákveðið að hætta útgáfu Fréttablaðsins ásamt því að stöðva útsendingar sjónvarpsstöðvarinnar Hringbrautar. „Allir ráðnir starfsmenn Torgs fengu greidd laun í dag,“ segir í yfirlýsingu á vef Fréttablaðsins. Hátt í hundrað manns missa vinnuna.
Fram kemur að rekstur DV.is og tengdra vefmiðla, hringbraut.is og Iceland Magazine muni halda áfram í félaginu Fjölmiðlatorgið ehf. Stjórn útgáfufélagsins segist hafa fulla trú á rekstri DV og tengdra miðla. Starfsemi þessara miðla verði haldið áfram „af fullum krafti“ auk þess sem upplýsingamiðlinum Iceland Magazine verður hleypt af stokkunum bráðlega.
„Vitanlega er mjög dapurleg niðurstaða sem hér er kynnt. En stjórnendur útgáfunnar hafa sannarlega leitað allra leiða til að finna henni viðunandi rekstrargrundvöll til framtíðar, en án árangurs. Stjórn félagsins harmar þessi málalok og þakkar þeim fjölmörgu starfsmönnum sem lagt hafa dag við nótt að treysta stoðir rekstrarins undanfarið og óskar þeim velfarnaðar,” segir í yfirlýsingu stjórnar Torgs.
Horfast í augu við breytt rekstrarumhverfi
Stjórnin segir að ástæður þess að rekstur Fréttablaðsins gekk ekki upp séu margvíslegar. Að hluta sé um að ræða óviðráðanlega þróun þar sem útgáfa fjölmiðla á pappír „hefur látið hratt undan síga víða um heim, ekki síður en hér á landi.”
„Stafrænir fjölmiðlar eru smám saman að taka yfir. Þá er rekstrarumhverfi einkarekinna miðla á Íslandi óboðlegt. Ekki er um annað að ræða en að horfast í augu við þessar staðreyndir. Allir ráðnir starfsmenn Torgs fengu greidd laun í dag.“
Stjórnin segir að Covid-faraldurinn hafi komið mjög illa við rekstur Fréttablaðsins, einkum vegna minni auglýsingasölu. Þá hafi stuðningur við einkarekinna fjölmiðla dugað skammt til. Þá hafi frídreifing Fréttablaðsins inn á heimili reynst of kostnaðarsöm.
„Stjórnendur útgáfunnar mátu það svo að um tímabundinn vanda væri að ræða sem þyrfti að komast í gegnum þar til eðlilegt ástand kæmist á að nýju. Veirutímabilið reyndist hins vegar mun lengra en ætlað var og þegar því lauk í byrjun mars 2022, braust út stríð í Úkraínu sem hafði truflandi áhrif víða um heim og leiddi til aukins kostnaðar tengdum mikilvægum aðföngum.“
Töpuðu 850 milljónum árin 2020-2021
Líkt og fyrr segir hefur rekstur Torgs gengið erfiðlega undanfarin ár. Félagið tapaði 253 milljónum króna árið 2021 og nærri 600 milljónum árið 2020, samkvæmt síðasta birta ársreikningi. Eignir Torgs voru bókfærðar á 1,25 milljarða króna í árslok 2021 en þar á meðal var viðskiptavild upp á 398 milljónir. Eigið fé var um 337 milljónir.
Helgi Magnússon er aðaleigandi Torgs en hann ásamt fleiri aðilum keyptu reksturinn af 365 miðlum árið 2019.
Hofgarðar, fjárfestingarfélag Helga, stofnaði félagið Fjölmiðlatorg ehf. í september síðastliðnum. Helgi vildi á þeim tíma ekki tjá sig um hið nýstofnaða félag.
