Danska hönnunarhúsið Paustian, eitt þekktasta nafn landsins í hágæða innanhússhönnun, er orðið gjaldþrota. Þetta gerist aðeins rúmu ári eftir að merkið var endurreist í nýju félagi eftir fjárhagslega endurskipulagningu.
Frantz Longhi, arkitekt og framkvæmdastjóri, sem er þekktur fyrir að hafa bjargað Kähler-merkinu á sínum tíma, hefur stýrt Paustian síðan 2017.
Hann viðurkennir nú að ekki hafi verið lengur forsvaranlegt að halda rekstrinum áfram.
Samkvæmt yfirlýsingu skiptastjórans, Anders Bendtsen lögmanns hjá Lind lögmannsstofunni, náði Paustian mettekjum upp á 250 milljónir danskra króna á síðasta ári.
En síðan hafi markaðurinn fyrir hágæða hönnunarhúsgögn tekið dýfu og sala minnkað verulega.
„Félagið gerði ráð fyrir að markaðurinn fyrir sérhönnuð húsgögn myndi taka við sér en hið gagnstæða gerðist – markaðurinn hrundi,“ segir í yfirlýsingu Bendtsen en Børsen greinir frá. .
Til viðbótar tókst ekki að ná samkomulagi um lægra húsaleiguverð fyrir verslun Paustian á Strikinu í Kaupmannahöfn.
„Leigan var einfaldlega of há miðað við núverandi markaðsaðstæður,“ segir í tilkynningunni.
Brunaútsala hefst strax
Vegna gjaldþrotsins verður allt vöruúrval verslunarinnar í Kaupmannahöfn, húsgögn og hönnunarvörur, metnar á yfir 10 milljónir danskra króna á kostnaðarverði, selt á „algjörum brunaútsöluverðum“ frá og með morgundeginum.
Skiptastjóri segir þó að verið sé að kanna möguleika á að halda Paustian-merkinu áfram í nýrri uppbyggingu, en það krefjist nýrra fjárfesta.
Longhi útilokar ekki að koma að slíku framtaki síðar, en segir nauðsynlegt að fá aðila með nýja sýn og reynslu úr greininni að borðinu.
Paustian var stofnað árið 1964 af Ole Paustian.
Frantz Longhi tók við rekstrinum og eignarhaldinu árið 2017 en eftir gjaldþrot verslunar í Árósum árið 2023 stóð verslunin í Kaupmannahöfn ein eftir.
Nýja félagið sem átti að bjarga merkinu var stofnað í ágúst 2024, en aðeins ári síðar er nú orðið ljóst að reksturinn stóð ekki undir sér.
