IKEA á Íslandi hefur ákveðið frá og með deginum í dag að lækka vöruverð á sex þúsund vörum. Engar vörur hækka í verði á móti en lækkunin er framhald á þróun sem hófst fyrir áramótin.
Samkvæmt tilkynningu frá IKEA eru verðlækkanirnar kynntar í verslun og á vef sem Nýtt lægra verð, enda er verðlækkunin ekki tímabundið tilboð.
Um er að ræða um 6% lækkun að meðaltali og festir IKEA vöruverð til ársloka 2024.
„Nýlegir samningar við birgja um lægra innkaupsverð gera okkur nú kleift að lækka verð. Á sama tíma tökum við ákvörðun um að festa verð til ársloka og gilda þessar breytingar nú frá 1. febrúar,“ segir Stefán Dagsson, framkvæmdastjóri IKEA.
„Aðstæður hafa skapast í okkar rekstri til að lækka verð aftur eftir umtalsverðar áskoranir síðustu ára. Erfiðleikar í aðfangakeðjunni hafa jafnað sig að mestu leyti, hráefnisverð hefur farið lækkandi og tekist hefur að hagræða í framleiðslu. Það er virkilega ánægjulegt að hafa svigrúm til að leggja okkar af mörkum í baráttunni við verðbólguna. Með þessu viljum við leggja okkar lóð á vogarskálarnar við að greiða fyrir því að SA og verkalýðshreyfingin klári skynsamlega samninga sem allra fyrst,“ segir Stefán.
