Hagfræðideild Landsbankans hefur lækkað verðbólguspá sína fyrir næstu mánuði í kjölfar þess að vísitala neysluverðs lækkaði um 0,15 prósent í ágúst og verðbólga hjaðnaði úr 4,0 í 3,8 prósent.
Bankinn hafði áður spáð því að vísitalan myndi standa í stað í ágúst og gerir nú ráð fyrir að ársverðbólga verði 3,8 prósent í lok árs, eða um 0,2 prósentustigum lægri en í fyrri spá.
Flugfargjöld og útsölur höfðu mest áhrif
Hagfræðideildin segir helstu frávikin frá fyrri spám vera meiri lækkun á flugfargjöldum til útlanda en búist var við, auk þess sem útsölur á fötum og skóm gengu hægar til baka en venjulega.
Verð á mat og drykkjarvöru hækkaði minna en búist var við, eða um 0,06 prósent í stað 0,1 prósents, og reiknuð húsaleiga hækkaði um 0,44 prósent á móti 0,6 prósenta spá bankans.
Á hinn bóginn gengu útsölur á húsgögnum og heimilisbúnaði hraðar til baka en gert var ráð fyrir og liðurinn hækkaði um 1,2 prósent í ágúst eftir 2,2 prósenta lækkun í júlí.
Lægri spá fram á árið
Bankinn spáir nú óbreyttri vísitölu í september, 0,29 prósenta hækkun í október, 0,1 prósenta lækkun í nóvember og 0,38 prósenta hækkun í desember.
Ef það gengur eftir verður verðbólgan 4,0 prósent í september og október og 3,8 prósent í nóvember og desember. Spáin fyrir reiknaða húsaleigu hefur einnig verið lækkuð, úr 0,6 prósent í 0,5 prósent hækkun á milli mánaða.
Hagfræðideildin bendir á að áhrif gjaldfrjálsra skólamáltíða, sem komu inn í mælinguna í fyrra, hverfi úr ársverðbólgunni í september og því muni árstölur hækka lítillega þó að undirliggjandi verðþróun sé að hægjast.
Spáin er aðeins lægri en síðasta spá sem við birtum í verðkönnunarvikunni, eða sem nemur um 0,2 prósentustigum. Mest áhrif hefur lægri mæling á verðbólgunni nú en við höfðum spáð. Við gerum líka ráð fyrir að útsölur á fötum og skóm gangi alveg til baka í næsta mánuði. Spá okkar fyrir reiknaða húsaleigu er nú um 0,5% hækkun á milli mánaða í staðinn fyrir 0,6% hækkun.
