Gangi forviðræður við Samkeppniseftirlitið vel verður samruni Arion banka og Kviku banka formlega tilkynntur til eftirlitsaðila. Samrunaferli Arion banka og Kviku banka er skipt í fjóra fasa og er ferlið nú í öðrum fasa. Í samantekt greiningarfyrirtækisins Akks segir að Arion banki hafi sjaldan verið jafn ódýr sé miðað við V/H hlutfall.
Forsvarsmenn Arion banka og Kviku banka hafa sent Samkeppniseftirlitinu (SKE) erindi með ósk um forviðræður vegna sameiningar bankanna. Þetta hefur Viðskiptablaðið fengið staðfest. Í þeim viðræðum verður Samkeppniseftirlitinu kynnt markmið sameiningarinnar, sem og sá ávinningur sem mun hljótast af henni fyrir íslenskan fjármálamarkað og neytendur.
Beiðnin til SKE um forviðræður er í takti við tilkynningu sem send var í Kauphöllina 21. júlí síðastliðinn, en í henni kom fram að stefnt væri að því að óska eftir forviðræðum við SKE í ágúst. Gangi þær viðræður vel verður samruninn tilkynntur formlega til eftirlitsaðila og síðar lagður fyrir hluthafafundi beggja félaga.
Ferlinu er skipt í fjóra fasa
Samrunaferli Arion banka og Kviku banka er skipt í fjóra fasa. Bankarnir tilkynntu þann 6. júlí að stjórnir félaganna hefðu ákveðið að hefja viðræður um sameiningu og viljayfirlýsing þess efnis hefði verið undirrituð. Samkvæmt viljayfirlýsingunni fá hluthafar Kviku 485.237.822 nýja hluti í Arion banka og eignast með því 26% hlut í sameinuðu félagi. Endurspeglar það gengið 19,17 krónur á hlut fyrir Kviku banka og 174,5 krónur á hlut fyrir Arion banka. Var þetta fyrsti fasi samrunans.
Í öðrum fasa samrunans eru forviðræðurnar við SKE um gerð áreiðanleikakannana. Þessi vinna er nú í gangi. Í þriðja fasa er samrunasamningur undirritaður og samrunatilkynning send til eftirlitsaðila eins og áður sagði. Fjórða fasa lýkur svo þegar öll skilyrði hafa verið uppfyllt og samþykkt af eftirlitsaðilum. Að því loknu fá hluthafar Kviku eignarhlut sinn í Arion banka afhentan og samruni Arion banka og Kviku banka klárast.
Nánar er fjallað um málið í Viðskiptablaðinu. Áskrifendur geta lesið fréttina í heild hér.
