Landsbréf hf., dótturfélag Landsbankans sem sérhæfir sig í sjóðastýringu og eignastýringarþjónustu, skilaði hagnaði upp á tæpar 457 milljónir króna eftir skatta á fyrri hluta ársins 2025.
Þetta er aukning frá rúmum 437 milljónum króna á sama tímabili árið áður og endurspeglar sterkan rekstur félagsins þrátt fyrir áframhaldandi óvissu á fjármálamörkuðum.
Samkvæmt nýbirtum árshlutareikningi námu hreinar rekstrartekjur félagsins 1.142 milljónum króna á tímabilinu, samanborið við 1.084 milljónir króna á fyrri hluta ársins 2024.
Auknar þóknanatekjur af stýringu verðbréfa- og sérhæfðra sjóða höfðu þar mest áhrif, auk jákvæðrar þróunar á skuldabréfamörkuðum.
Arðgreiðsla lækkar eigið fé
Eigið fé Landsbréfa var 3.847 milljónir króna í lok júní en nam 4.390 milljónum króna í árslok 2024. Lækkunin skýrist að mestu af því að félagið greiddi móðurfélagi sínu, Landsbankanum, 1.000 milljóna króna arðgreiðslu í maí.
Þrátt fyrir það hélt félagið áfram að vera mjög vel fjármagnað með eiginfjárhlutfall upp á 82,94 prósent í lok tímabilsins.
Í lok árs voru 22 stöðugildi í Landsbréfum hf. og ársverkin voru 22,0. Heildarlaunakostnaður á fyrri árshelmingi var tæpar 391 milljón króna en var á sama tímabili árið áður tæpar 356 milljónir króna.
Helgi Þór Arason framkvæmdastjóri Landsbréfa segir að afkoman endurspegli bæði sterkan rekstur og breytilegar markaðsaðstæður.
„Rekstur Landsbréfa gekk vel á tímabilinu og hagnaður endurspeglar traustan rekstur félagsins. Markaðsaðstæður héldu áfram að vera krefjandi á fyrri hluta ársins, einkum á innlendum hlutabréfamarkaði. Verðbólga hefur komið hægar niður en vonir stóðu til og vaxtastig hefur haldist hátt. Það er sameiginlegt verkefni allra að stuðla að lægri verðbólgu til að tryggja að hagkerfið nái mjúkri lendingu og tryggja þannig stöðugleika til framtíðar. Ávöxtun sjóða Landsbréfa var misgóð á tímabilinu eftir tegundum sjóða en vel ásættanleg í samanburði við helstu samkeppnisaðila. Landsbréf hafa haldið áfram að treysta stöðu sína sem leiðandi sjóðastýringarfyrirtæki á Íslandi. Félagið rekur sem fyrr fjölbreytt úrval verðbréfasjóða og sérhæfðra sjóða auk þess sem félagið sinnir afmörkuðum eignastýringarverkefnum fyrir lífeyrissjóði og fleiri stærri fjárfesta.“
Alls voru um 21 þúsund einstaklingar og lögaðilar með fjármuni í sjóðum Landsbréfa í lok júní 2025. Eignir í stýringu voru samtals 567 milljarðar króna í lok júní 2025 samanborið við 543 milljarða króna í lok árs 2024.
