Sjávarútvegsfyrirtækið Vinnslustöðin í Vestmannaeyjum (VSV) hefur ákveðið að grípa til uppagna 50 starfsmanna og loka fiskvinnslunni Leo Seafood.
Í yfirlýsingu frá Vinnslustöðinni kemur fram að fyrirtækið hafi undanfarnar vikur unnið að endurskoðun á rekstrinum í leit að hagræðingu vegna hækkun veiðigjalda. Hækkun veiðigjalda hjá samstæðunni er áætluð um 850 milljónir króna á ári og áætlað er að þau verði um 1.450 milljónir árlega.
„Fyrsta skrefið var að stöðva allar fyrirhugaðar framkvæmdir og kaup á nýjum skipum. Það eitt og sér dugir ekki til og því þarf að grípa til fleiri aðgerða. Stjórn Vinnslustöðvarinnar hefur því ákveðið að loka fiskvinnslunni Leo Seafood. Það er erfið en nauðsynleg ákvörðun. Við breytingarnar þarf félagið að grípa til uppsagna 50 starfsmanna,“ segir í tilkynningunni.
Félagið segir að auk þess hafi verið gríðarlegar hækkanir á launakostnaði og sterk króna hafi einnig gert rekstur Leo Seafood erfiðan.
„Í tvö ár hefur verið unnið að hagræðingu sem hefur borið árangur en Leo Seafood er ennþá í taprekstri. Í kjölfar lokunar á Leo Seafood mun hluti þess fiskjar sem unninn var þar verða unninn í saltfiskvinnslu Vinnslustöðvarinnar en jafnframt verður sala á markaði aukin.“
Launakostnaður Leo Seafood nam á síðasta ári 550 milljónum króna. Bent er á ríkið og Vestmannaeyjabær verði af 122 milljónum við þessa aðgerð í formi útsvars og skatta.
Vinnslustöðin hefur á undanförnum árum ráðist í miklar fjárfestingar með aukinni skuldsetningu og miðuðust áætlanir félagsins við óbreytta skattheimtu ríkisins á sjávarútveginn. Þær forsendur séu nú brostnar.
Forsvarsmenn Vinnslustöðvarinnar hafa ítrekað varað við þeim afleiðingum sem þessi aðgerð ríkisins hafi í för með sér. Nægir þar að nefna umsögn Vinnslustöðvarinnar til atvinnuveganefndar Alþingis sem og opinn fund sem haldinn var í Vestmannaeyjum um hækkun veiðigjalda og afleiðingar þess á samfélagið í Eyjum. Fleiri aðgerðir eru til skoðunar hjá Vinnslustöðinni til að bregðast við ákvörðun stjórnvalda um hækkun veiðigjalda.
„Við verðum að velta við hverjum steini í rekstrinum. Ég minni á að á síðasta ári var Vinnslustöðin rekin með tapi og nú bætist við stóraukin skattheimta. Því eru aðgerðir sem þessar óhjákvæmilegar. Áætlaður sparnaður af lokun Leo Seafood nemur um 400 milljónum króna,“ segir Sigurgeir B. Kristgeirsson, forstjóri Vinnslustöðvarinnar.
„Ég vil koma á framfæri þökkum til starfsfólks og stjórnenda Leo Seafood sem hafa staðið sig vel í sínum störfum fyrir félagið og óska þeim velfarnaðar.“
Vinnlustöðin keypti Leo Seafood árið 2022. Í yfirlýsingu VSV er rifjað upp eftirfarandi orð Sigurgeirs sem hann lét falla þegar tilkynnt var um kaup félagsins á Ós og Leo Seafood:
„Við munum gera út Þórunni Sveinsdóttur áfram með áhöfninni sem þar er og engar breytingar eru heldur fyrirsjáanlegar í Leo Seafood.”
