Fjárfestingafélagið Viska Digital Assets hefur tekið upp nýtt nafn og heitir nú Viska sjóðir. Samhliða nafnabreytingunni hefur félagið kynnt nýjan sjóð, Viska macro, sem að sögn félagsins byggir á heildarsýn þess á þróun alþjóðlegs efnahagsumhverfis og áhrifum gervigreindar á hagkerfi heimsins.
Í tilkynningu félagsins kemur fram að Viska macro muni leggja áherslu á fjárfestingar í tækni og hörðum eignum, þar sem sérstaklega sé horft til þeirrar fjárfestingarþarfar sem fylgi ört vaxandi notkun gervigreindar.
Sjóðurinn verður eingöngu markaðssettur gagnvart fagfjárfestum og mun að meginstefnu til fjárfesta í hlutabréfum.
„Frá stofnun Visku höfum við lagt áherslu á að greina og skilja þær umbreytingar sem eiga sér stað í heimshagkerfinu. Rafmyntir og bálkakeðjutækni voru fyrsti fókusinn en við höfum jafnframt bent á að ákveðnir eignaflokkar munu einnig njóta góðs af þessum breytingum. Þar má nefna eignir eins og gull og ákveðnar hrávörur auk annarra eigna sem við munum leggja áherslu á í nýjum sjóði,“ segir Daði Kristjánsson, framkvæmdastjóri Visku sjóða.
„Gervigreindin er stærsta tæknibylting okkar tíma og mun að okkar mati hafa víðtækari áhrif en tilkoma Internetsins. Til þess þarf gríðarlega fjárfestingu í innviðum, orku og hrávörum sem mun að okkar mati skapa mikil tækifæri á næstu árum sem Viska macro ætlar sér að nýta,“ segir Guðlaugur Gíslason, fjárfestingastjóri Visku sjóða.
