Á lista Tekjublaðs Frjálsrar verslunar yfir endurskoðendur er Samúel Orri Samúelsson hjá Alvotech efstur með 5,59 milljónir króna í reiknuð mánaðarlaun miðað við greitt útsvar.
Auk hans eru þrír aðrir með yfir 3 milljónir króna í mánaðarlaun. Sigurður Sigurgeirsson hjá Landsbankanum er í öðru sæti með 3,39 milljónir króna.
Matthías Þór Óskarsson, löggiltur endurskoðandi og meðeigandi KPMG , er í þriðja sæti listans með 3,17 milljónir króna. Þar á eftir kemur Margrét G Flóvenz, löggiltur endurskoðandi.
Þess má geta að Guðmundur Björgvin Helgason ríkisendurskoðandi, sem er ekki löggiltur endurskoðandi, var með 2,2 milljónir króna í mánaðarlaun í fyrra. Fimmtán einstaklingar á listanum yfir endurskoðendur voru launahærri en ríkisendurskoðandi í fyrra.
Hægt er að kaupa Tekjublaðið hér. Að auki er blaðið til sölu í öllum helstu verslunum landsins.
Vegna útgáfu Tekjublaðsins er nauðsynlegt að árétta að um er að ræða útsvarsskyldar tekjur á árinu 2024 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Miðað er við útsvarsstofn samkvæmt álagningarskrá. Í tölunum eru ekki fjármagnstekjur, t.d. af vöxtum, arði eða sölu hlutabréfa. Hafa verður í huga að inni í tekjum getur verið einskiptisgreiðsla vegna úttektar á séreignasparnaði hjá lífeyrissjóði.
