Laun tekjuhæstu einstaklinganna í flokki sjómanna og útgerðarmanna í nýútgefnu Tekjublaði Frjálsrar verslunar, sem nær yfir tölur á árinu 2024, voru umtalsvert lægri heldur en á fyrra ári.
Meðallaun tíu launahæstu sjó- og útgerðarmanna landsins námu 4,7 milljónum króna í fyrra. Til samanburðar voru meðallaun tíu efstu á listanum ári áður 7,8 milljónir króna (leiðrétt fyrir einum útlaga).
Sé horft til efstu 50 á listanum og þá voru meðallaun tekjuhæstu einstaklinganna 3,52 milljónir króna á árinu 2024 en 5,15 milljónir króna á árinu 2023.
Þrír tekjuhæstu einstaklingarnir á listanum voru með yfir 5 milljónir króna í mánaðarlaun á árinu 2024.
Sigurður V Jóhannesson, stýrimaður í Neskaupsstað, er efstur á listanum með 5,19 milljónir króna í laun á mánuði í fyrra. Þar á eftir kemur Tómas Kárason, skipstjóri á Belti NK með 5,06 milljónir og Jónas Henningsson, stýrimaður á Stokkseyri með 5,0 milljónir.
Hægt er að kaupa Tekjublaðið hér. Að auki er blaðið til sölu í öllum helstu verslunum landsins.
Vegna útgáfu Tekjublaðsins er nauðsynlegt að árétta að um er að ræða útsvarsskyldar tekjur á árinu 2024 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Miðað er við útsvarsstofn samkvæmt álagningarskrá. Í tölunum eru ekki fjármagnstekjur, t.d. af vöxtum, arði eða sölu hlutabréfa. Hafa verður í huga að inni í tekjum getur verið einskiptisgreiðsla vegna úttektar á séreignasparnaði hjá lífeyrissjóði.
