Sesselja Sigurborg Ómarsdóttir, framkvæmdastjóri lyfjavísinda hjá Alvotech og fyrrverandi prófessor í lyfjafræði við Háskóla Íslands, er launahæst á lista yfir laun skólafólks. Meðallaunatekjur hennar á síðasta ári námu 10,4 milljónum króna á mánuði.
Í öðru sæti listans er Bjarni Elvar Pétursson, starfandi deildarforseti tannlæknadeildar HÍ og tannlæknir hjá tannlæknastofunni Valhöll. Hann var með tæpar 6,0 milljónir króna í mánaðarlaun í fyrra.
Alls voru 32 einstaklingar á lista yfir skólafólk í Tekjublaði Frjálsrar verslunar með yfir 2 milljónir króna í reiknuð mánaðarlaun út frá greiddu útsvari.
Ragnhildur Helgadóttir, rektor Háskólans í Reykjavík, er í sjötta sæti listans með tæpar 3,0 milljónir króna í mánaðarlaun.
Jón Atli Benediktsson, sem lét af embætti rektors Háskóla Íslands í ár, er í 26. sæti með tæplega 2,2 milljónir króna í mánaðartekjur. Eftirmaður hans, Silja Bára Ómarsdóttir, prófessor í alþjóðasamskiptum við Stjórnmálafræðideild Háskóla Íslands, var með tæplega 1,7 milljónir króna í mánaðarlaun.
Eyjólfur Guðmundsson, fyrrverandi rektor Háskólans á Akureyri var með tæplega 1,9 milljónir króna í mánaðartekjur.
Hægt er að kaupa Tekjublaðið hér. Að auki er blaðið til sölu í öllum helstu verslunum landsins.
Vegna útgáfu Tekjublaðsins er nauðsynlegt að árétta að um er að ræða útsvarsskyldar tekjur á árinu 2024 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Miðað er við útsvarsstofn samkvæmt álagningarskrá. Í tölunum eru ekki fjármagnstekjur, t.d. af vöxtum, arði eða sölu hlutabréfa. Hafa verður í huga að inni í tekjum getur verið einskiptisgreiðsla vegna úttektar á séreignasparnaði hjá lífeyrissjóði.
