Ákvörðun Shari Redstone, sem erfði ráðandi hlut í Paramount Global samstæðunni frá föður sínum, um að selja hluti sína hefur farið öfugt ofan í aðra hluthafa og valdið töluverðri ókyrrð innan samstæðunnar.
Paramount Global, sem á sjónvarpsstöðvarnar CBS, MTV, Nikckelodeon og kvikmyndaverið Paramount, hefur verið í eigu Redstone fjölskyldunnar í næstum þrjá áratugi en faðir Sheri, Sumner Redstone, keypti samstæðuna árið 1994.
Samkvæmt The Wall Street Journal byrjaði Shari að huga að því að breyta hlutum sínum í handbært fé í fyrra en hún er sögð hafa fundið verulega fyrir því fjárhagslega þegar samstæðan ákvað að draga úr arðgreiðslum, sem hefur verið aðal innkoma Redstone-fjölskyldunnar árum saman.
Skömmu síðar ákvað David Ellison, forstjóri Skydance Media og sonur milljarðamæringsins Larry Ellison, að kanna áhuga Shari á mögulegum samruna fyrirtækjanna tveggja og var hún meiri en til.
Samkvæmt WSJ hefur hins vegar gengið brösulega síðustu vikur að gera samrunan að veruleika, sem er sagður eitt mesta klúður í manna minnum.
Markaðsvirðið lækkað um 80% á 8 árum
Hluthafar eru uppreisn gegn fyrirhuguðum samruna og hefur það varpað nýju ljósi á þekkt vandamál innan Paramount; Það sem er gott fyrir Redstone fjölskylduna er ekki endilega það besta fyrir félagið.
Deilurnar urðu þess valdandi að Bob Bakish forstjóri Paramount var sagt upp störfum í gær og ákvað Redstone fjölskyldan þess í stað að stofna „skrifstofu forstjóra“ sem verður rekin af sameiginlega af framkvæmdastjórum hvers sviðs.
Að mati WSJ hefði alltaf verið erfitt að selja Paramount í þessu árferði, þrátt fyrir að samþykki annarra hluthafa lægi fyrir, þar sem félagið hefur verið á mikilli niðurleið.
Kapalsjónvarp í Bandaríkjunum er ekki jafn arðbært og áður á meðan streymisveita Paramount hefur ekki náð sama flugi og vonir stóðu til. Markaðsvirði Paramount hefur lækkað um 80% síðastliðinn átta ár undir stjórn Redstone fjölskyldunnar og hefur auður þeirra dregist saman um marga milljarða Bandaríkjadali vegna þess.
Að vona er ekki viðskiptaáætlun
Redstone fjölskyldunni hefur staðið til boða árum saman að brjóta samstæðuna upp og selja eignir en alltaf neitað því.
Netflix og Apple voru um tíma á eftir kvikmyndaframleiðslu samstæðunnar á meðan Showtime bauðst til að kaupa sjónvarpstöðvarnar og þá hefur Comcast lýst yfir áhuga á mögulegum samruna á streymisveitum fyrirtækjanna.
Shari Redstone sýndi þessu öllu lítinn áhuga og hélt, samkvæmt WSJ, alltaf í vonina um að einn af tæknirisunum myndi kaupa alla samstæðuna vel yfir markaðsvirði. Það varð aldrei neitt úr því.
„Eina von hennar er ef Apple myndi sjá hag sinn í því kaupa samstæðuna en það er ekki viðskiptaáætlun að bíða og vona“ segir Robert Fishman, hjá greiningardeild MoffetNathanson í samtali við WSJ.
Hlutir Shari keyptir vel yfir markaðsvirði
Ef Shari tekst að selja Paramount til Skydance fengi hún, samkvæmt heimildum WSJ, um tvo milljarða Bandaríkjadali í reiðufé fyrir hlutabréf sín sem eru með um 77% atkvæðisrétt innan samstæðunnar. Hlutabréfaeigendur án atkvæðisréttar fá greitt með bréfum í hinu sameinaða félagi.
Núverandi markaðsvirði hlutar Shari er um 750 milljónir Bandaríkjadala og fengi hún því vænlega greitt fyrir sinn hlut.
Aðrir hluthafar hafa hins vegar látið í sér heyra í fjölmiðlum og á samfélagsmiðlum þar sem þeir segja að samruninn er frábær fyrir Shari Redstone en slæmur fyrir fyrirtækið.
Skydance brást við á sunnudaginn og uppfærði yfirtökutilboðið. Samkvæmt heimildum WSJ lækkar greiðslan til Shari Redstone og gefur öðrum hluthöfum fleiri hluti í sameinaða félaginu.
Eignastýringarfyrirtækið Apollo Global Management hefur á sama tíma lagt fram tilboð í samstæðuna sem hljóðar upp á 26 milljarða Bandaríkjadali en Apollo myndi taka á sig allar skuldir samstæðunnar og leggja félaginu til 12 milljarða dali. Stjórn Paramount hefur þó áhyggjur af því hvernig Apollo hyggst fjármagna kaupin en Apollo er nú í viðræðum við Sony Pictures um að taka þátt í yfirtökutilboðinu með þem.