Alvotech tilkynnti í morgun að félagið hafi gert samning í Bandaríkjunum um dreifingu og sölu á líftæknilyfjahliðstæðu Alvotech í háum styrk með útskiptileika við Humira (adalimumab) við Quallent Pharmaceuticals, dótturfélag Cigna.
Í kauphallartilkynningusegir að samningurinn sé gerður með samþykki Teva Pharmaceuticals, sem er samstarfsaðili Alvotech í Bandaríkjunum.
„Við fögnum því að ganga til samstarfs við Alvotech um aukið aðgengi sjúklinga að adalimumab-ryvk. Það er markmið okkar að geta boðið flestum sjúklingum lyfið án greiðsluþátttöku þeirra,“ segir John Caufield, forstjóri Quallent Pharmaceuticals Health, LLC.
„Markmið Quallent er að bjóða sjúklingum örugg og hagkvæm lyf í samstarfi við lyfjafyrirtæki eins og Alvotech. Þetta samstarf auðveldar okkur að ná þessu markmiði.“
„Alvotech tryggði sér í febrúar síðastliðnum einkarétt í tólf mánuði eftir að sala hefst, til að bjóða í Bandaríkjunum líftæknilyfjahliðstæðu í háum styrk með útskiptileika við Humira. Um 85% af sölu Humira í Bandaríkjunum er það lyfjaform sem Alvotech hefur fengið markaðsleyfi fyrir. Við höfum þar af leiðandi fundið fyrir mjög sterkum áhuga innkaupaaðila og heilbrigðistryggingafyrirtækja í Bandaríkjunum. Með þessum samningum stígum við enn eitt skrefið í átt að auknu aðgengi sjúklinga að hagkvæmari líftæknilyfjum,” segir Róbert Wessman, stjórnarformaður og forstjóri Alvotech.
„Teva einbeitir sér að því að lækka kostnað í heilbrigðiskerfinu og bjóða sjúklingum hagkvæmar lausnir, eins og adalimumab í háum styrk með útskiptileika,“ segir Thomas Rainey, framkvæmdastjóri markaðsaðgengis fyrir Teva í Bandaríkjunum.
„Samstarf Teva og Alvotech hefur þegar leitt til markaðsleyfa fyrir tvær mikilvægar líftæknilyfjahliðstæður, en við höfum verið að vinna saman að níu verkefnum. Tvær líftæknilyfjahliðstæður til viðbótar sem við þróum í samvinnu, eru nú á lokastigi klínískrar þróunar.“
Matvæla- og lyfjaeftirlit Bandaríkjanna (FDA) veitti markaðsleyfi fyrir líftæknilyfjahliðstæðu Alvotech í háum styrk með útskiptileika við Humira þann 24. febrúar sl. Markaðsleyfi FDA heimilar notkun lyfsins til meðferðar við við iktsýki hjá fullorðnum, sjálfvakinni fjölliðagigt hjá börnum, sóraliðabólgu fullorðinna, alvarlegri hrygggigt fullorðinna, Chrons-sjúkdómnum, sáraristilbólgu fullorðinna, skellusóra hjá fullorðnum, graftarmyndandi svitakirtlabólgu fullorðinna og æðahjúpsbólgu fullorðinna.
