Andri Már Ingólfsson stofnandi og fyrrum eigandi Primera Travel Group, Sveinn Ragnarsson fjármálastjóri félagsins og Arion Banki voru sýknaðir af skaðabótakröfum tveggja þrotabúa í héraðsdómi í Herning á Jótlandi á föstudaginn.
Skiptastjórar þrotabúanna Travelco Nordic og Travelco Holding kröfðust um 50 milljóna danskra króna eða 1 milljarður íslenskra króna frá Andra Má og Sveini og 58 milljóna danskra króna eða um 1,2 milljarða frá Arion banka, samkvæmt frétt FF7.
„Að draga mig og fyrrum fjármálastjóra inn í þessi málaferli 5 árum eftir að Arion banki tekur af mér fyrirtækið, var afar sérstakur gjörningur,“ segir Andri Már í samtali við FF7.
Málið á sér langan aðdraganda en í október 2018 varð flugfélagið Primera Air, sem var í eigu Primera Travel Group sem Andri Már átti, gjaldþrota. Í kjölfarið var eignarhald á nokkrum norrænum ferðaskrifstofum sem tilheyrðu samstæðunni fært yfir í danska félagið Travelco Nordicsem Andri Már átti.
Íslensku ferðaskrifstofurnar Heimsferðir og Terra Nova, sem voru hluti af Primera Travel, gótu undir hatt Travelco Nordic í desember 2018 til að styrkja eiginfjárstöðu félagsins að kröfu danska ferðaábyrgðasjóðsins.
Um mitt ár 2019 leysti Arion Banki Travelco Nordic til sín sem hluti af uppgjöri sínu við Andra Má en hálfu ári síðar seldi bankinn Terra Nova til íslensku ferðaskrifstofunnar Travel Connect.
Samkvæmt danska ferðatímaritinu Standby kostuðu gjaldþrot Travelco Nordic og Travelco Holding danska ferðatryggingarsjóðinn 68 milljónir danskra króna sem samsvara um 1,4 milljörðum króna á gengi dagsins. Danska ríkið veitti fyrirtækjunum til viðbótar Covid-lán að upphæð 1,7 milljarða króna sem var aldrei endurgreitt.
Í vetur fóru því skiptastjórar þrotabúanna tveggja í mál á hendur fyrrum stjórnendum Travelco Nordic í Danmörku, Primera Travel Group á Íslandi og Arion banka.
Samkvæmt FF7 snérist málflutningur að mestu um meint ofmat á virði íslensku ferðaskrifstofanna og að þar sem Arion Banki hafi verið með veð í þeim hafi tilflutningurinn frá íslenska félaginu yfir í Travelco Nordic ekki styrkt eiginfjárstöðu félagsins í takt við bókfært virði.
Sem fyrr segir voru Andri Már og Sveinn sýknaðir af kröfum Travelco Nordic og Arion banki sýknaður af kröfum Travelco Holding.