Hlutabréfaverð Kviku Banka hefur hækkað um 3% í um 350 milljón króna viðskiptum í dag og stendur gengið í 16,4 krónum. Hlutabréf bankans hafa nú hækkað um rúm 23% síðastliðinn mánuð en gengið stóð í 13,3 krónum í lok nóvember.
Velta með bréf bankans hefur aukist til muna á síðustu vikum en tíu af stærstu þrjátíu viðskiptadögum ársins miðað við veltu voru í desember.
Velta með bréf bankans frá 22. nóvember til 21. desember nam 12,1 milljarði króna. Veltan milli 22. október til 21. nóvember nam ekki nema 3,3 milljörðum króna.
Kvika banki tilkynnti þann 17. nóvember síðastliðinn að bankinn hefði hafið söluferli á dótturfélagi sínu TM tryggingum.
Kvika hyggst selja allt útistandandi hlutafé í TM eða selja hlut í félaginu til kjölfestufjárfesta sem kann að leiða til skráningar.
Gildi lífeyrissjóður keypti 29. nóvember 30 milljónir hluta, eða um 0,6% eignarhlut, í Kviku banka fyrir 420 milljónir króna.
Gildi, sem er fimmti stærsti hluthafi Kviku, á nú 5,43% hlut í Kviku.
Gengi hlutabréfa Kviku í viðskiptunum var 14,0 krónur á hlut. Markaðsvirði hlutanna sem keyptir voru í lok nóvember er rúmlega 492 milljón króna virði í dag eftir gengishækkanir Kviku í desember.
Eignarhlutur Gildis er um 4,25 milljarða króna virði miðað við gengi dagsins.
