Festi hefur gengið frá kaupréttarsamningum við starfsfólk sitt í samræmi við kaupréttaráætlun sem var samþykkt á aðalfundi félagsins í byrjun mars.
Aðalfundur gaf stjórn heimild til að gera kaupréttarsamninga við allt fastráðið starfsfólk samstæðunnar um kaup á hlutum í félaginu.
Markmið áætlunarinnar er að tengja hagsmuni starfsfólks við afkomu og langtímamarkmið félagsins og hluthafa þess.
Í kauphallartilkynningu félagsins í morgun er greint frá því að allt tóku 1.118 starfsmenn samstæðunnar taka þátt í kerfinu sem nær til allt að 2.917.980 hluta á ári, eða 8.753.940 hluta fyrir öll þrjú árin, miðað við 100% nýtingu kauprétta.
Kaupverð hluta er vegið meðalverð í viðskiptum með hlutabréf félagsins síðustu tíu viðskiptadaga fyrir samningsdag, sem er 24. apríl 2024, eða kr. 191,50 hver hlutur.
Samkvæmt áætluninni öðlast hver kaupréttarhafi rétt til að kaupa hluti í Festi fyrir að hámarki 500.000 krónur einu sinni á ári í þrjú ár, þ. e. eftir birtingu ársfjórðungsuppgjörs vegna 1. ársfjórðungs fyrir árin 2025, 2026 og 2027.
Í tilkynningu segir að starfsfólki sé heimilt að fresta nýtingu sinni á réttinum, í heild eða hluta, á fyrsta og/eða öðru nýtingartímabili til næsta nýtingartímabils eða þess þriðja. Að loknu þriðja nýtingartímabili falla allir ónýttir kaupréttir niður.
