Matsfyrirtækið Fitch hefur lækkað lánshæfismat Bandaríkjanna í AA+ úr AAA.
Ákvörðun Fitch kemur örfáum vikum eftir því að ríkissjóður Bandaríkjanna var nálægt greiðslufalli vegna deilna fulltrúadeildarinnar og Joe Biden forseta um hækkun skuldaþaksins.
Fitch segir óreiðu í stjórnmálum og versnandi skuldastaða ríkissjóðs vera meðal ástæðna fyrir ákvörðuninni.
Um er að ræða í fyrsta skipti í meira en áratug sem eitt af þremur stóru matsfyrirtækjunum í Bandaríkjunum lækkar lánshæfismat Bandaríkjanna.
Standards & Poors lækkuðu lánshæfismat ríkisins úr AAA flokki í fyrsta skipti í sögunni árið 2011. Var sú ákvörðun einnig tekin eftir harðar deilur í þinginu um hækkun skuldaþaksins.
Sögulega hafa ríkisskuldabréf bandaríska ríkisins verið áhættulaus fjárfesting og samkvæmt The Wall Street Journal eru fáir sem telja það muni breytast með breyttu lánshæfismati.
Matsfyrirtækið Moodys heldur lánshæfismati Bandaríkjanna enn í AAA.
„Geðþóttaákvörðun byggð á úreltum gögnum“
Í rökstuðningi Fitch segir að ákvörðunin endurspegli „upplausnina í stjórnskipulaginu“ síðustu tvo áratugi í samanburði við önnur stórveldi í heiminum.
„Endurteknar deilur um skuldaþakið og lausnir á síðustu stundu hafa dregið úr trausti á ríkisfjármálunum,“ segir í ákvörðun Fitch.
Ríkisstjórn Joe Biden hefur gagnrýnt ákvörðunina og kennt ríkisstjórn forvera síns um skuldavandræði Bandaríkjanna.
Janet Yellen fjármálaráðherra Bandaríkjanna sagði í tilkynningu að lækkunin væri „geðþóttaákvörðun byggð á úreltum gögnum.“