Hlutabréfaverð Marels lækkaði um rúm 4% í 860 milljón króna viðskiptum í Kauphöllinni í dag. Marel birti uppgjör eftir lokun markaða í gær en fyrirtækið tapaði um 3,2 milljónum evra, sem nemur 478 milljónum króna, á fyrsta fjórðungi.
Til samanburðar hagnaðist félagið um 9,1 milljón evra, eða um 1,4 milljarða króna á sama tímabili í fyrra.
Árni Sigurðsson, forstjóri Marels, segir í afkomutilkynningu félagsins að árið hafi farið rólega af stað í samræmi við væntingar. Stjórnendur félagsins sjá þó skýr batamerki í rekstrarumhverfi viðskiptavina og jákvæðari horfum byggt á lækkandi fóðurverði og hækkandi vöruverði.
Fjölmörg önnur félög á aðalmarkaði lækkuðu einnig í viðskiptum dagsins en
Hlutabréfaverð Sýnar lækkaði einnig um 4% í viðskiptum dagsins en fjarskipta- og fjölmiðlafyrirtækið birti einnig árshlutauppgjör eftir lokun markaða í gær.
Sýn tapaði 153 milljónum króna á fyrsta ársfjórðungi samanborið við 213 milljóna hagnað á sama tímabili í fyrra.
Tekjur Sýnar á fyrsta fjórðungi jukust um 1,3% milli ára og námu 5.934 milljónum króna. Framlegð félagsins dróst hins vegar saman um 10,5% milli ára og nam 1.852 milljónum.
Hlutabréfaverð Alvotech lækkaði einnig um tæp 4% í um hálfs milljarðs króna veltu. Dagslokagengi Alvotech var 1870 krónur.
Hlutabréf í Íslandsbanka lækkaði einnig um tæp 4% og var dagslokagengi bankans 97,2 krónur.
Ísfélagið leiddi hækkanir á markaði er gengi félagsins fór upp um 1,6% í um 50 milljón króna viðskiptum.
Hlutabréfaverð Nova hækkaði einnig um 1% í 180 milljón króna veltu en engin önnur félög hækkuðu um meira en 1%.
Úrvalsvísitalan OMXI 15 lækkaði um 2,12% og var heildarvelta á markaði 4,3 milljarðar.