Halldór Kristmannsson, einn stærsti einkafjárfestir í fjölmiðla- og fjarskiptafélaginu Sýn, segir sterk rök fyrir því að afskrá félagið. Hann hefur verið að nýta sér lágt gengi félagsins í Kauphöllinni til að byggja upp stöðu í fyrirtækinu.
Þetta kemur fram í pistli Halldórs í Viðskiptablaðinu en hann segist hafa skoðað kosti afskráningar gaumgæfilega.
„Fyrir nokkrum vikum stóð markaðsvirði Sýnar í aðeins 9,5 milljörðum króna og miðað við gengi dagsins stendur það nú í um 10,5 milljörðum króna. Ég hef litið á þetta sem tækifæri og byggt upp hlutabréfastöðu í fyrirtækinu á þessum tíma. Frá því ég kom aftur inn í eigendahóp Sýnar, eftir um tveggja ára hlé, hef ég skoðað gaumgæfilega kosti afskráningar,” skrifar Halldór.
„Þegar væntanlegt verðmæti undirliggjandi eigna er meira en tvöfalt markaðsvirði fyrirtækisins, gefur auga leið að lítið gagn er af kostnaði og flækjum hlutabréfamarkaðarins. Ég tel eðlilegt að stærstu eigendur fyrirtækisins hugleiði alvarlega að gera öðrum hluthöfum yfirtökutilboð, í ljósi núverandi verðlagningar á markaði,” skrifar Halldór.
Í grein fagnar Halldór einnig nýrri kaupréttaráætlun fyrir alla starfsmenn og segir það jákvætt verið tengja saman hagsmuni starfsfólks við afkomu og langtímamarkmið fyrirtækisins og hluthafa þess.
„Fyrir komandi vegferð breytinga er mikilvægt að stjórnendur hafi „skin in the game“ eins og stundum er sagt. Hluti stjórnenda hefur einnig fjárfest beint í fyrirtækinu og er það góðs viti.”
Hægt er að lesa grein Halldórs í heild sinni hér.
