Átta milljarða dala kauphallarsjóður Ark Invest, ARKK, skilaði 68% ávöxtun í fyrra samkvæmt gögnum frá Morningstar enFinancial Times greinir frá.
Cathie Wood, forstjóri Ark Invest, segir sjóðinn hafa gengið í gegnum erfiða tíma síðastliðinn ár en nú sé hann loks að ná vopnum sínum.
Eignasafn kauphallarsjóðsins rýrnaði um 75% á tveggja ára tímabili á árunum 2021 og 2022 eftir um 150% ávöxtun árið 2020 sem má að mestu rekja til hækkunar á virði bréfa í Tesla sem sjóðurinn á töluvert af.
Sjóðurinn fjárfestir nær eingöngu í tækni- og sprotafyrirtækjum sem áttu mörg hver erfitt með að fóta sig þegar vextir hækkuðu.
„Ég veit ekki hvað gerðist fyrir okkur á árunum 2021 og 2022,“ segir Wood í samtali við Financial Times. „Niðursveiflan er óskiljanleg því nýsköpunarfyrirtæki eru tilbúin fyrir stóra sviðið,“ bætir Wood við sem er sannfærð um að vextir og verðbólga lækki verulega á árinu.
Gengi ARKK hefur lækkað um 10% á árinu en lækkun á hlutabréfaverði Tesla spilar þar stórt hlutverk.
Miklar sveiflur síðustu ár
Robby Greengold, greiningaraðili hjá Morningstar, segir að rannsóknarvinnan hjá Ark Invest bendi til þess að sjóðurinn sé oft aðeins of bjartsýnn á markaðsaðstæður og það gleymist jafnvel oft að leiða hugann að öðrum mögulegum niðurstöðum.
Kauphallarsjóðurinn hefur endað síðastliðin fjögur ár annað hvort með mestu eða verstu ávöxtun vestanhafs samkvæmt gögnum Morningstar. Kauphallarsjóðir eru metnir með stjörnum á skalanum 1 til 5 hjá greiningarfyrirtækinu sem heldur áfram að gefa ARKK eina stjörnu þrátt fyrir metávöxtun í fyrra.