Hagnaður Kviku Banka fyrir skatta (án aðkomu TM trygginga) nam 1,2 milljörðum króna á fyrsta ársfjórðungi. Mun það vera um 36% meiri hagnaður en á sama tímabili í fyrra þegar bankinn skilaði 895 milljón króna hagnaði.
Hagnaður eftir skatta dróst saman um 7% og nam 1.083 milljónum króna, samanborið við 1.167 milljónir á sama tímabili árið 2023.
Arðsemi efnislegs eigin fjár fyrir skatta var 12,1%, samanborið við 13,1% á sama tímabili árið 2023. Arðsemi efnislegs eiginfjár af áframhaldandi starfsemi nam 15,5% á fyrsta ársfjórðungi 2024.
„Rekstur bankastarfsemi Kviku var prýðilegur á fyrsta ársfjórðungi og ánægjulegt að sjá umtalsverða hagnaðaraukningu af starfseminni milli ára. Hagnaður fyrir skatta á fyrsta ársfjórðungi, án afkomu TM, nam 1.215 milljónum króna, samanborið við 895 milljónir króna á sama tímabili árið 2023 og hækkar því um 36% frá árinu áður,” segir Ármann Þorvaldsson, forstjóri Kviku.
Hreinar vaxtatekjur bankans námu rúmum 2,3 milljörðum króna samanborið við um 2 milljarða á sama tímabili árið 2023 og hækkuðu um 17% frá fyrra ári.
Vaxtamunur var 3,8% á fyrstu þrem mánuðum ársins 2024.
Hreinar þóknanatekjur námu 1,6 milljörðum króna, samanborið við 1,5 milljarða á sama tímabili árið 2023 og hækkuðu um 10% frá fyrra ári.
Aðrar rekstrartekjur námu 110 milljónum króna, samanborið við 16 milljónir á sama tímabili árið 2023.
„Nær allir tekjuliðir jukust milli ára á sama tíma og vel gekk að halda aftur af kostnaði. Þrátt fyrir þráláta verðbólgu og umtalsverðar launahækkanir náðist að halda rekstrarkostnaði nánast óbreyttum milli ára. Allar viðskiptaeiningar bankans gengu vel á fyrsta ársfjórðungi og ánægjulegt er að sjá viðsnúninginn sem hefur verið í rekstri bankans í Bretlandi eftir krefjandi umhverfi undanfarin tvö ár. Arðsemi af efnislegu eigin fé bankastarfseminnar var 15,5%, sem er nokkuð undir langtímamarkmiði okkar en við sjáum þess merki að við munum nálgast það markmið á næstu misserum,” segir Ármann.
Í uppgjörinu segir Ármann að tryggingarekstur TM var í takt við áætlanir og keimlíkur fyrsta fjórðungi síðasta árs, en fyrsti fjórðungur ársins er að öllu jöfnu sá þyngsti í rekstri tryggingafélaga. Markaðsaðstæður voru hins vegar óhagstæðar á tímabilinu og fjárfestingatekjur félagsins voru því talsvert undir væntingum.
„Hagnaður fyrir skatta, að meðtalinni afkomu TM, nam 1.345 milljónum króna. Arðsemi efnislegs eigin fjár fyrir skatta var 12,1%. Vinna við lúkningu endanlegrar áreiðanleikakönnunar og undirritun kaupsamnings við Landsbankann vegna sölu TM hefur gengið ágætlega og mun bankinn halda markaðnum upplýstum eftir því sem mál þróast,“ segir Ármann.
