Landsvirkjun hagnaðist um 114 milljónir dala eða um, eða um tæplega 15 milljarða króna, á fyrstu sex mánuðum ársins. Til samanburðar hagnaðist ríkisfyrirtækið um 137,5 milljónir dala á sama tímabili í fyrra en þá var hagnaður Landsnets hluti af rekstrarniðurstöðunni.
„Rekstur Landsvirkjunar gengur áfram vel. Hagnaður af grunnrekstri jókst um 27% frá sama tímabili ársins 2022, sem þó var metár í sögu fyrirtækisins,“ segir Hörður Arnarson, forstjóri Landsvirkjunar, í afkomutilkynningu.
„Rekstrartekjur jukust um 12,5% frá fyrri helmingi ársins 2022. Munar þar mestu um tekjur vegna innleystra áhættuvarna, auk þess sem raforkusala var áfram mikil, en á móti kemur verðlækkun á þeim mörkuðum sem raforkuverð til stórnotenda er að hluta til tengt við. Á sama tíma lækkaði rekstrar- og viðhaldskostnaður um 6% frá fyrra ári.“
Rekstrartekjur Landsvirkjunar námu 332 milljónum dala eða um 45,5 milljörðum króna og hækka um 12,5% frá sama tímabili á árinu áður.
Hörður segir að fjármunamyndun hafi verið sterk á tímabilinu en handbært fé frá rekstri jókst um 29,7% og nam 34 milljörðum króna.
Eignir Landsvirkjunar voru bókfærðar á 3,75 milljarða dala eða um 513 milljarða króna í lok júní. Eigið fé var um 2,27 milljarðar dala eða um 310 milljarðar króna.
Augljós orkuþörf
Hörður segir að rekstur aflstöðva hafi gengið vel á fyrri helmingi ársins. Hins vegar hafi þurft að takmarka afhendingu á skerðanlegri orku til gagnavera og fiskmjölsframleiðenda á fyrsta fjórðungi, þar sem raforkukerfið sé nú rekið nærri hámarks afkastagetu.
„Eins og við hjá Landsvirkjun höfum ítrekað bent á síðustu ár og misseri ríður á að byggja upp frekari raforkuvinnslu til að uppfylla þá augljósu orkuþörf sem er í samfélaginu vegna orkuskipta og almenns vaxtar í atvinnulífinu. Landsvirkjun vinnur nú hörðum höndum að því að afla tilskilinna leyfa svo fyrirtækinu sé unnt að mæta þessum sjálfsögðu kröfum samfélags og stefnu stjórnvalda.“
