Ferðaþjónustan hér á landi hélt áfram að rísa úr öskustónni á síðasta ári eftir mjög erfitt tímabil í faraldrinum. Erlendum ferðamönnum fjölgaði um 1 milljón milli ára og voru þeir 1,7 milljón yfir árið í heild. Þessi aukning átti stærstan þáttinn í þeim rekstrarbata sem greinin upplifði í fyrra en tekjur fyrirtækja í greininni námu 748 milljörðum króna sem er met.

Greinin í heild sinni skilaði hagnaði í fyrsta sinn síðan fyrir faraldur og ljóst að aukinn fjöldi erlendra ferðamanna á þessu ári mun skjóta sterkari stoðum undir reksturinn.

Þrátt fyrir að greinin hafi skilað hagnaði í heild sinni var honum verulega misskipt. Sumir geirar ferðaþjónustunnar áttu mjög gott ár meðan einstaka geirar voru enn að reka sig með tapi.