Greiningardeild Landsbankans spáir því að íslenska krónan muni styrkjast smám saman á næstu tveimur árum samkvæmt hagspá bankans til ársins 2026.
Að mati bankans eru horfur í utanríkisviðskiptum nokkuð góðar og er búist við lítils háttar afgangi af viðskiptum við útlönd.
„Áfram stefnir í nokkurn vaxtamun við útlönd sem styður við gengi krónunnar og í því samhengi má benda á aukinn áhuga erlendra aðila á íslenskum ríkisskuldabréfum. Markaðsaðilar eru almennt bjartsýnir á gengi krónunnar sem sést meðal annars í stöðu framvirkra samninga með gjaldeyri. Hugsanlega er þegar búið að verðleggja þessa áhrifaþætti inn í gengið. Eins og alltaf má búast við þó nokkrum gengissveiflum innan árs og jafnvel innan mánaða á spátímabilinu,” segir í hagspá Landsbankans.
Hagspá bankans gerir jafnframt ráð fyrir að raungengi krónu hækki á spátímabilinu ef spáin gengur eftir verður raungengið 2026 svipað og það var þegar það var hvað hæst á síðasta uppgangstíma ferðaþjónustunnar árið 2017.
„Gangi gengisspáin eftir verður nafngengi í ár svipað að meðaltali og í fyrra, þrátt fyrir styrkingu það sem eftir er árs. Hækkun raungengisins á þessu ári verður eingöngu vegna þess að verðbólga er meiri hér en í helstu viðskiptalöndum okkar. Á næstu tveimur árum hækkar raungengið svo áfram, aðallega vegna hlutfallslega mikillar verðbólgu hér á landi en þó einnig vegna sterkara nafngengis,” segir í hagspá bankans.
Þetta þýðir til dæmis að evrópskur ferðamaður fær færri krónur fyrir hverja evru og einnig minna magn af vörum og þjónustu hér á landi fyrir hverja krónu.
