Fasteignafélagið Reginn hefur ákveðið að breyta um nafn og mun félagið heita Heimar héðan í frá. Nafnabreyting var kynnt á fjárfestafundi sem hófst síðdegis í dag.
Í tilkynningu frá Reginn segir að nafninu sé ætlað að styðja við stefnu félagsins sem felur í sér að búa til eftirsótta borgarkjarna í samræmi við aukna umhverfisvitund, breyttar samgöngur, sjálfbærni og ný viðhorf.
„Í dag eru 65% af fermetrum félagsins innan skilgreindra kjarnasvæða félagsins og leigutekjur af kjarnasvæðum um 70% af heildarleigutekjum. Í samræmi við fjárfestingarstefnu félagsins felast langtímamarkmið og heildarsýn félagsins í að þróa og stækka eignasafnið með eignum innan kjarnasvæða félagsins, m.t.t. sjálfbærni við val á eignum og fjölbreytni meðal leigutaka félagsins,“ segir í tilkynningu Regins.
Þá er einnig greint frá því að Heimar muni vera leiðandi í að skapa borgarkjarna utan um fjölbreytta atvinnustarfsemi, íbúabyggð, afþreyingu og nærþjónustu á helstu markaðssvæðum á höfuðborgarsvæðinu og Akureyri.
„Nafninu Heimar er enn fremur ætlað að marka félaginu frekari sérstöðu og aðgreiningu á markaði auk þess að marka nýtt upphaf,“ segir í tilkynningunni.
