Félagsmenn í Félagi flugmálastarfsmanna ríkisins (FFR) og Sameykis, stéttarfélags í almannaþjónustu samþykktu í hádeginu verkfallsaðgerðir sem hafa verið boðaðar á mánudaginn.
Samkvæmt tilkynningu á vefsíðu FFR greiddu 89,87% félagsmanna með tillögunni. Á kjörskrá voru 494 og greiddu alls 377 atkvæði og var kjörsókn því 76,1%.
Á fimmtudaginn í næstu viku hefst klukkan 16 ótímabundið yfirvinnubann hjá félagsmönnum Sameykis og FFR sem starfa hjá Isavia og dótturfélögum.
Á vefsíðu FFR segir að samningnefndir FFR og Sameykis ákváðu á fundi 28. apríl að boða til yfirvinnu- og þjálfunarbanns ásamt tímabundnum og tímasettum aðgerðum við öryggisleit og farþegaflutninga eftir að samtöl stéttarfélaganna við Samtök atvinnulífsins fyrir hönd ISAVIA ohf. reyndust árangurslaus.
Samningaviðræður hafa staðið síðan í september 2023 og var deilunni vísað til ríkissáttasemjara þann 8. apríl sl.