Hlutabréfaverð bandarísku bílasölunnar Carvana hækkaði um 40% síðastliðinn fimmtudag eftir að fyrirtækið birti árshlutauppgjör fyrir opnun markaða.
Gengi fyrirtækisins hefur nú hækkað um 150% á árinu en samkvæmt upplýsingum frá S3 Partners LLC. Er því tap skortsala á árinu komið í 3,9 milljarða Bandaríkjadali eða um 544 milljarða króna.
Samkvæmt frétt Bloomberg töpuðu skortsalar 860 milljónum dala á gengishækkun fimmtudagsins sem samsvarar 124 milljörðum íslenskra króna á gengi dagsins.
Síðastliðið ár hefur gengi Carvana hækkað um 976% en bílasalan átti erfitt með að halda flugi sínu gangandi eftir að Covid-19 faraldrinum lauk.
Carvana er fyrsta bílasalan þar sem allt ferlið er alveg rafrænt. Eftirspurn eftir notuðum bílum náði hámarki í kringum faraldurinn og rauk gengi fyrirtækisins upp.
Í ágúst 2021 stóð hlutabréfaverð félagsins í 370 dölum en þrátt fyrir allar hækkanir síðastliðið ár stendur gengið í 122 dölum þegar þetta er skrifað.
Tekjuspá fyrir árið hækkuð um 60%
Skuldastaða fyrirtækisins hefur ávallt verið áhyggjuefni fyrir fjárfesta en í júlí í fyrra skuldaði samstæðan 8,5 milljarða Bandaríkjadali og voru 74,5% af þeim skuldum óverðtryggðar.
Fyrirtækið náði samkomulagi um endurskipulagningu skulda síðasta sumar sem lækkaði skuldir félagsins um 1,2 milljarða en samhliða því var farið í hlutafjáraukningu.
Greiningarfyrirtækið William Blair hækkaði tekjuspá sína fyrir Carvana um 60% eftir árshlutauppgjörið en fyrirtækið telur nú að tekjur bílasölunnar verði í kringum 1 milljarð dala á árinu. William Blair býst einnig við því að tekjurnar muni þrefaldast fyrir árið 2025.
