Gengi mörg hundruð fyrirtækja á aðalmörkuðum Bandaríkjanna fóru undir 1 dal á árinu samkvæmt gögnum Dow Jones Market en The Wall Street Journal greinir frá
Á föstudaginn síðastliðinn voru hlutabréf 557 fyrirtækja á aðalmörkuðum undir einum dal en þau voru færri en 12 árið 2021.
Samkvæmt The Wall Street Journal er í flestum tilfellum um að ræða gengishrun hjá sprotafyrirtækjum sem mörg hver fóru bakdyraleiðina inn á aðalmarkað með sérhæfðum yfirtökufélögum (e. SPAC).
Flest þeirra eða 464 eru skráð á Nasdaq-hlutabréfamarkaðinn en reglur Nasdaq kveða á um að hlutabréf skráðra félaga verði að vera yfir einum dal annars eiga þau í hættu á að vera afskráð.
Talsmenn fjárfestaverndar vilja sjá félögin afskráð enda mörg þeirra augljóslega svokölluð „penny stocks“ sem eiga lítið erindi í Kauphöllina í New York eða Nasdaq.
„Hlutabréfamarkaðir eiga að vera hliðverðir og skrá bara alvöru fyrirtæki sem hafa hag fjárfesta fyrir brjósti,“ segir Rick Fleming, fyrrum starfsmaður fjárfestaverndar hjá Verðbréfaeftirliti Bandaríkjanna.
Ráðast í öfuga skiptingu til að ná genginu upp
Samkvæmt reglum Nasdaq fá félög sem fara undir einn dal rúmt ár til að rétta úr kútnum en talsmaður Nasdaq, segir í samtali við WSJ að fyrirtæki þurfa að mæta ýmsum kröfum til viðbótar til að halda skráningu.
Alls eru 583 félög á Nasdaq sem eru ekki að standast skyldur skráningar. Um er að ræða fyrirtæki með of lítið flot eða of fáa hluthafa svo dæmi séu tekin.
Samkvæmt WSJ reyna félög með gengið undir einum dal oft að komast hjá afskráningu með því að ráðast í öfuga skiptingu hluta (e. reverse stock split) til að ná genginu aftur upp.
Hlutabréf Aeye fallið um 98%
Meðal þeirra er AEye, sprotafyrirtæki sem þróar skynjara fyrir sjálfkeyrandi bíla, en félagið fór á markað gegnum sérhæft yfirtökufélag árið 2021. Gengi Aeye hefur fallið um 98% frá skráningu og stendur gengið í 15 sentum í dag.
Gengið er að nálgast eitt ár undir einum dal en talsmaður fyrirtækisins segir félagið stefna á öfuga skiptingu fyrir árslok til að bjarga sér.
Alls hafa 255 fyrirtæki ráðist í öfuga skiptingu á árinu sem er hækkun úr 159 fyrirtækjum í fyrra samkvæmt Wall Street Horizon.
Fjölmörg tækifæri til að rétta úr kútnum
Samkvæmt reglum Nasdaq fá fyrirtæki viðvörun ef gengið hefur verið undir einum dal í 30 daga. Fyrirtæki fá þá 180 daga til að ná genginu aftur upp en að þeim loknum er hægt að sækja um 180 daga til viðbótar til þess að ráðast í öfuga skiptingu.
Þegar Nasdaq ákveður að afskrá fyrirtækja geta þau jafnframt áfrýjað ákvörðuninni og fengið sérstök réttarhöld til að reyna komast hjá afskráningu en áfrýjun kostar 20 þúsund dali eða 2,8 milljónir króna.
Samruni Aurora Acquisition Corp., sérhæfðs yfirtökufélags Björgólfs Thors Björgólfssonar, og bandaríska húsnæðislánafyrirtækisins Better Mortgage fór í gegn í lok ágúst en félagið er líklegast meðal þeirra sem hefur fengið aðvörun frá Nasdaq.
Viðskipti með hlutabréf sameinaðs félags hófust formlega fimmtudaginn 24. ágúst. Hlutabréfaverð Better lækkaði um 93% og fór undir einn dal 28. ágúst.
Félagið hefur verið undir einum dal síðan þá og stendur í 45 sentum í dag. Útboðsgengið í frumútboði Aurora var 10 dalir.
