Eftir öfluga byrjun á árinu hefur hlutabréfamarkaðurinn hérlendis gefið eftir síðustu tvo viðskiptadaga. Úrvalsvísitalan OMXI 15 lækkaði um 1,5% í viðskiptum dagsins og hefur því lækkað um tæp 2% síðustu tvo daga.
Hlutabréf í Alvotech lækkuðu einnig annan daginn í röð en félagið tilkynnti fyrir opnun markaða nú að framkvæmdastjórn Evrópusambandsins hafi veitt markaðsleyfi fyrir Uzpruvo, líftæknilyfjahliðstæðu Alvotech við Stelara. Lyfið er eitt af tíu mest seldu lyfjum Evrópu. Árlegar tekjur af sölu þess á Evrópumarkaði nema um 380 milljörðum króna.
Gengi Alvotech hafði hækkað um 40% síðastliðinn mánuð en lækkaði um tæp 5% síðastliðna tvo daga
Hlutabréfaverð Íslandsbanka lækkaði mest er gengið fór niður um tæp 3% í viðskiptum dagsins.
Dagslokagengið var 120 krónur sem er þó hærra en útboðsgengið í útboði Bankasýslunnar en hlutabréf bankans eyddu stórum hluta síðasta árs vel undir útboðsgenginu.
Gengi Marels lækkaði um 2% í 300 milljón króna veltu og var dagslokagengið 458 krónur.
Ekkert félag hækkaði meira en 1% en gengi Brims og Símans fóru upp um hálft prósent í um 100 milljón króna veltu hvor. Heildarvelta á markaði var 4,6 milljarðar.
