Hlutabréfasjóðir í virkri stýringu hafa ekki verið að njóta góðs af aukinni þátttöku almennings á hlutabréfamarkaði.
Útflæði úr hlutabréfum sjóðum í virkri stýringu nam 50 milljörðum bandaríkjadala á fyrstu þremur mánuðum ársins, sem samsvarar um 6.965 milljörðum íslenskra króna á gengi dagsins.
Samkvæmt Financial Times er útflæðið byrjað að hafa veruleg áhrif á stærstu eignastýringarfyrirtæki Bandaríkjanna líkt og Capital Group, T Rowe Price og Franklin Templeton.
Fjárfestar vestanhafs hafa verið í meira mæli en áður að fjárfesta í sjóðum sem fylgja hlutabréfavísitölum fremur en þeim sem eru í virkri stýringu og kaupa og selja hlutabréf.
„Útflæðið er ekki gott og þrátt fyrir að framkvæmdastjórar eignastýringarfyrirtækjanna séu að reyna líta á björtu hliðarnar er erfitt að sjá ástandið batna til skamms tíma,“ segir Brennan Hawken, sérfræðingur í eignastýringu hjá UBS, í samtali við FT.
1,7 billjóna dala útflæði
Stöðugt útflæði úr hlutabréfasjóðum hefur veikt vonir greiningaraðila um að hlutabréfamarkaðurinn vestanhafs myndi ná jafnvægi í bráð eftir miklar sveiflur síðastliðinn ár.
Hlutabréfasjóðir í virkri stýringu hafa verið með neikvætt útflæði síðastliðna 30 mánuði og hafa fjárfestar dregið 1,7 billjónir (e. trillion) dali úr hlutabréfasjóðum á þeim tíma, samkvæmt gögnum frá Morningstar.
Fjárfestingastjórar eignastýringafyrirtækja eru þó sagðir jákvæðir fyrir framtíðinni en samhliða útflæði úr hlutabréfasjóðum hefur verið innflæði í kauphallarsjóði, erlenda sjóði og aðrar eignir í stýringu.