Stjórn Regins óskaði eftir heimild Fjármálaeftirlits Seðlabanka Íslands (FME) til að falla frá valfrjálsu tilboði félagsins í allt hlutafé Eikar fasteignafélags á mánudaginn eftir um 11 mánaða yfirtökuferli.
Meðal þess sem félögin deildu um var skiptihlutfallið en samkvæmt greiningu Jakobsson Capital er virði eiginfjár Regins 64,5 milljarðar króna og að virði eiginfjár Eikar sé 59,6 milljarðar. Þannig fékkst sú niðurstaða að skiptihlutfall félaganna yrði 52,0% fyrir Reginn og 48,0% fyrir Eik en svo hljóðaði uppfærða yfirtökutilboð Regins.
Arctica Finance veitti stjórn Eikar ráðgjöf í ferlinu en að þeirra mati væri sanngjarnt hlutfall hluthafa Eikar 50,6% á móti 49,4% hlutfalli hluthafa Regins.
Meðan á ferlinu stóð óskaði stjórn Eikar eftir því að setjast niður með stjórn Regins til að reyna að ná saman um samning sem gæti hugnast hluthöfum Eikar en Bjarni segir að ekki hafi verið vilji fyrir því.
„Við buðum yfirtökufélaginu að setjast niður með stjórn Eikar og kanna hvort þær viðræður gætu leitt til einhverra breytinga sem við teldum að hluthöfum okkar myndi hugnast. Þannig að þrátt fyrir að við værum ekki með formlega aðkomu, þá stóð vilji okkar til þess að liðka fyrir,“ segir Bjarni.
„Við lögðum áherslu á að það væri ekki hlutverk stjórnarinnar að koma í veg fyrir að hluthafar gætu tekið afstöðu til tilboðsins eða að reyna að hindra framgang tilboðsins ef vilji hluthafa væri fyrir hendi. Þvert á móti ætti það að vera hlutverk okkar að reyna að koma á samningi sem gæti verið hagstæður fyrir hluthafa okkar og við buðumst til að hefja viðræður við stjórn yfirtökufélagsins og sjá hvort við gætum liðkað fyrir á einhvern hátt með því að hafa áhrif á tilboðið. En yfirtökufélagið sagði einfaldlega nei, það taldi ekki rétt að setjast niður með stjórn, yfirtökutilboðið væri til eigenda Eikar en ekki stjórnar félagsins,“ segir Bjarni að lokum.
Áskrifendur geta lesið lengri umfjöllun Viðskiptablaðsins um málið hér.