Wayve Technologies safnaði áskriftum fyrir meira en einum milljarði Bandaríkjadala í síðustu fjármögnunarlotu en samkvæmt The Wall Street Journal mun fyrirtækið geta nýtt sér féð í að sækja fram og auka framleiðslu.
Breska fyrirtækið WT greindi frá því í gær að Softbank, Nvidia og Microsoft hefðu öll tekið þátt í síðustu fjármögnunarlotu en að sögn fyrirtækisins mun féð gera því kleift að geta fullkomnað sjálfkeyrandi eiginleika bifreiða.
Samkvæmt WSJ mun félagið einnig nýta fjármagnið í að sækja fram á nýjum mörkuðum en eftir hlutafjáraukninguna mun Softbank fá eitt stjórnarsæti.
Rishi Sunak, forsætisráðherra Bretlands, sagði í yfirlýsingu að hann væri hæstánægður með fjármögnunarlotuna, enda væri nýsköpun og frumkvöðlastarfsemi jákvæð fyrir Bretland.
Wayve Technologies hefur framkvæmt rannsóknir og þróun á sjálfkeyrandi eiginleikum bifreiða á breskum vegum frá árinu 2018.