Nú á dögum tala stjórnmálamenn mikið um sjálfbærni og hvernig eigi að draga úr sóun í samfélaginu. Þeirri umræðu ber að fagna enda er saga velsældar heimsins sú að gera meira fyrir minna. Grundvöllur nýsköpunar er að leysa verkefni á ódýrari og betri hátt en áður var gert. Einhverra hluta vegna halda hins vegar stjórnmálamenn að lausnin felist í meiri lagasetningu eða fjölgun reglugerða. Það er önnur mun skilvirkari lausn sem blasir við en fáir stjórnmálamenn virðast vilja sjá hana.

Framleiðni hins opinbera er afskaplega léleg, hvort heldur er í samanburði við ríkisrekstur í nágrannalöndum, eins og tölur frá McKinsey (Charting a Growth Path for Iceland 2012 og síðar) bera með sér, en sérstaklega lélegar í samanburði við einkarekstur. Það er alveg sama hvert horft er, til gangagerðar og innviðaframkvæmda, flutninga, bygginga fasteigna, læknisþjónustu, fjölmiðlareksturs, verslunarreksturs eða annars, hið opinbera stendur einkarekstri langtum aftar.