Hlutabréfaverð Íslandsbanka og Kviku banka hefur lækkað um 3,5% og 2,5% í morgun en báðir bankarnir skila árshlutauppgjöri eftir lokun markaða í dag.
Gengi Arion banka, sem skilaði uppgjöri í síðustu viku, hefur einnig lækkað um 2,5% í yfir 700 milljón króna veltu í morgun en um 46% af allri veltu í Kauphöllinni hefur verið með bréf Arion Banka þegar þetta er skrifað.
Gengi Íslandsbanka stendur í 100 krónum eftir tæpa 9% lækkun síðastliðna þrjá mánuði.
Gengi Kviku hefur farið úr 17,2 krónum í 13,65 krónur sem samsvarar um 21% lækkun á sama tímabili.
Sem fyrr segir er Arion Banki eini bankinn á markaði sem hefur skilað árshlutauppgjöri en afkoma Arion banka var undir væntingum.
Bankinn hagnaðist um 4,4 milljarða króna á fyrsta ársfjórðungi 2024 samanborið við 6,3 milljarða hagnað á sama tímabili í fyrra.
„Við sjáum að nokkuð hefur hægst á umsvifum í efnahagslífinu í ljósi hárra stýrivaxta og er það eitt af því sem hefur áhrif til lækkunar á þóknanatekjum tímabilsins,“ sagði Benedikt Gíslason forstjóri Arion Banka í uppgjörinu.
Arðsemi eiginfjár Arion banka var 9,1% á fyrstu þremur mánuðum ársins en til samanburðar var arðsemi bankans 13,7% á sama tímabili í fyrra.
Rekstrartekjur Arion á fyrsta fjórðungi námu 14,5 milljörðum króna og drógust saman um 6,7% frá sama tímabili í fyrra. Kjarnatekjur, þ. e. hreinar vaxta-, þóknana- og tryggingatekjur (án rekstrarkostnaðar tryggingastarfseminnar), drógust saman um 2%.
Hreinar vaxtatekjur jukust um 2,3% og námu 11,2 milljörðum. Hreinar þóknanatekjur drógust saman um 24% milli ára og námu 3,4 milljörðum króna.
