Bankaráð Landsbankans segir að bankasýsla ríkisins hafi verið upplýst um áform bankans um að kaupa TM tryggingar af Kviku banka, samkvæmt bréfi bankaráðs til Bankasýslunnar.
Bankasýslan óskaði eftir greinargerð frá bankanum um kaupin en líkt og komið hefur fram í fjölmiðlum var bankasýslan ekki upplýst um þegar skuldbindandi tilboð var lagt fram né þegar tilboð var samþykkt.
Bankaráð segir í greinargerð sinni þó hafa greint bankasýslunni frá kaupunum og vísar í samskipti í júlí og desember 2023.
„Í tölvupósti frá formanni bankaráðs 11. júlí 2023 til Bankasýslunnar var greint frá því að bankinn hefði haft samband við Kviku og lýst yfir áhuga bankans á að kaupa TM. Bankasýslan svaraði tölvupóstinum samdægurs án athugasemda varðandi kaupin,“ segir í greinargerð bankans sem skilað var til bankasýslunnar í dag.
Formlegt söluferli á TM hófst 17. nóvember 2023 og segir í greinargerð að formaður bankaráðs hafi upplýst bankasýsluna símleiðis undir lok desember 2023 að bankinn hefði skilað inn óskuldbindandi tilboði í TM.
„Í kjölfarið tók bankinn þátt í ferli sem lauk með því að bankinn lagði fram skuldbindandi tilboð í félagið þann 15. mars 2024. Þann 17. mars var Bankasýslan upplýst um að Kvika hefði samþykkt skuldbindandi tilboð bankans. Bankasýslan setti aldrei fram athugasemdir eða óskaði eftir frekari upplýsingum eða gögnum frá bankaráði fyrr en eftir að tilkynnt var um samþykki Kviku á skuldbindandi tilboði bankans.“
Að mati bankaráðs uppfyllti bankinn þannig skyldur sínar til upplýsingagjafar í samræmi við núgildandi eigandastefnu ríkisins sem og samkvæmt samningi bankans við Bankasýsluna frá 2010.
„Það er mat bankaráðs að ákvörðun um kaup á TM sé á forræði bankaráðs, kaupin á TM samrýmist eigendastefnu ríkisins og þjóni langtímahagsmunum bankans og hluthafa. Með því að bæta tryggingum við þjónustu Landsbankans geti bankinn boðið viðskiptavinum sínum enn betri og fjölbreyttari þjónustu, auk þess sem það muni styrkja reksturinn og auka verðmæti bankans,“ segir í greinargerð.
„Kaup bankans á TM eru ekki talin auka áhættu í rekstri bankans umfram þann ávinning sem hlýst af kaupunum. Kaupin hafi ekki áhrif á getu bankans til að uppfylla arðgreiðslustefnu bankans um að greiða að jafnaði um 50% af hagnaði fyrra árs í arð til hluthafa en muni styrkja arðgreiðslugetu bankans til lengri tíma,“ segir þar enn fremur.