Danól ehf., dótturfélag Ölgerðarinnar, sem stefndi íslenska ríkinu á þriðjudaginn fyrir að hafa leynt mikilvægum gögnum bæði á stjórnsýslustigi og fyrir Landsrétti, segir í stefnu sinni tollgæslustjóra vera vanhæfan í málinu.
Landsréttur dæmdi íslenska ríkinu í hag eftir áralangar deilur sem hófust er Bændasamtök Íslands og Mjólkursamsalan sóttu að stjórnvöldum um að pítsuosturinn, Festino IQF Mozzarella Pizza Mix, yrði flokkaður í 4. kafla tollskrárinnar, sem ber háa tolla, bæði magn- og verðtolla, í stað þess að flokkast í 21. kafla, sem ber enga tolla.
Í tölvupóstsamskiptum milli Skattsins, fjármálaráðuneytisins, lögmanns MS og tollgæslustjóra sem er að finna í dómskjölum má sjá áhuga og þrýsting samkeppnis- og hagsmunaaðila á tollskráningunni.
Í einum tölvupóstinum staðfestir tollgæslustjóri við lögmenn MS, löngu áður en bindandi álit skattsins er gefið út, að pítsuosturinn umræddi verði settur undir 4. kafla.
Staðfestir tollgæslustjóri einnig við samkeppnisaðila Danól að Skatturinn muni endurskoða sendingar sex ár aftur í tímann. Er það afstaða Danól að tollgæslustjóri hafi með þessari yfirlýsingu, til samkeppnisaðila fyrirtækisins, gert sig vanhæfan til töku þeirrar ákvörðunar sem krafist er ógildingar á.
Í tölvupósti Sigurðar Skúla Bergssonar tollgæslustjóra til lögmanns MS þann 23. júní 2020 segir: „Tollayfirvöld geta staðfest að „Mozzarella pizza mix“ mun, í samræmi við álit starfsmanna framkvæmdarstjórnar ESB, verða flokkað í 4. kafla tollskrár en hvorki 19. né 21. kafla. […] . Loks mun endurskoðunardeild Skattsins athuga hvort vörur sem ættu að vera í 4. kafla í samræmi við ofangreind sjónarmið hafi á sl. sex árum verið flokkaðar í aðra kafla tollskrár.“
Hafa ber hér í huga að á þeim tíma sem tollgæslustjóri gefur umrædda yfirlýsingu til lögmanna MS hefur Evrópusambandið leiðrétt hina meintu afstöðu sem kom fram í pósti Alexanders Blaha og segir Danól því að tollgæslustjóri sé ekki í „góðri trú hvað þetta varðar“. Sem fyrr segir hafnaði Endurupptökudómur að taka málið upp að nýju en Héraðsdómur Reykjavíkur þingfesti stefnu Danól gegn íslenska ríkinu sem fyrr segir á þriðjudaginn.
Áskrifendur geta lesið lengri umfjöllun Viðskiptablaðsins um málið hér.
