Röraframleiðandinn Set ehf á Selfossi hefur keypt allt hlutafé í fyrirtækinu Dælur og þjónusta ehf. sem nú síðast var í eigu Ísfells hf. Dælur og þjónusta er gamalgróið fyrirtæki sem á rætur allt aftur á fyrstu áratugi liðinnar aldar en fyrirtækið og forverar þess hafa þjónað innlendum markaði í fjölmörgum atvinnugreinum.
Hjalti Þorsteinsson starfaði lengi hjá Dælum og hefur nú verið ráðinn sölu og rekstrarstjóri í lagnavörum í vöruhúsi Set í Reykjavík. „Reynsla hans á þessu sviði og víðtæk og góð tengsl við birgja félagsins er ásamt góðri samvinnu við tæknideild Set ætlað að veita markaðnum góða ráðgjöf,“ segir í fréttatilkynningu.
Set mun bjóða upp á búnað og lausnir frá viðurkenndum aðilum á sviði dælutækninnar samhliða ýmsum öðrum hliðarvörum með framleiðslu fyrirtækisins og sérsmíði. Þessi útvíkkun á starfseminni er sögð rökrétt framhald af vaxandi aðkomu félagsins að hönnun og tæknilegum úrlausnarefnum á fjölbreyttum lagnasviðum fyrir veitustofnanir og ýmsa atvinnuvegi.
Hjá Set starfa nú um 90 manns í aðalstöðvum félagsins á Selfossi, í vöruhúsi í Klettagörðum, verkmiðju Set Pipes GmbH í Haltern am See í sambandsríkinu Nord Reihn Westphalia í Þýskalandi og nýrri söluskrifstofu félagsins Set Pipes AS í Frederikshavn á norður Jótlandi í Danmörku.
