„Þetta er þá stefnan og við hlut­hafar hljótum að hugsa það“

Davíð Harðar­son, stjórnar­for­maður Haga og hlut­hafi í Play, spurði stjórn­endur flugfé­lagsins á upp­lýsinga­fundi í gær af hverju flug­fé­lagið væri ekki með meiri elds­neytis­varnir til að verja rekstrar­af­komuna fyrir hærra elds­neytis­verði.

Flug­fé­lagið sér fram á að skila 550 milljóna króna hagnaði á þriðja árs­fjórðungi en um tíu milljóna dala rekstrar­tap á árinu í heild sinni, eða sem nemur um tæplega 1,4 milljörðum króna.

Vonir voru um að fé­lagið myndi skila rekstrar­hagnaði í ár í fyrsta sinn í sögu félagsins en af­komu­spáin var færð niður í byrjun september, einkum vegna hærri eldsneytis­verðs.

„Það væri á­huga­vert að heyra, og ég geri mér grein fyrir því að það er auð­velt að vera vitur eftir á, en hvernig er það ef við förum sex mánuði aftur í tímann? Hvernig kom það ekki til á­lita, þegar fé­lagið stefndi í hagnað, að verja þá stöðu í ríkari mæli með á­hættu­vörnum í elds­neyti,“ spurði Davíð á fundinum.

Birgir Jóns­son for­stjóri Play sagði fé­lagið með mjög „hraust­legar elds­neytis­varnir“ sem væru lík­legast á­stæðan fyrir því að rekstar­niður­staðan væri ekki verri áður en Einar Örn Ólafs­son stjórnar­for­maður Play greip orðið og sagði flug­fé­lagið vera búið verja dug­lega í elds­neytis­varnir.

Staðan væri þannig að um 50% af elds­neytis­notkun á þriðja árs­fjórðungi hafi verið varin og rúm­lega 40% af fjórða árs­fjórðungi er varin.

„Við erum með stefnu sem segir allt að 60% næstu þrjú og svo 40% og 30%,“ sagði Einar og bætti við að banda­rísku flug­fé­lögin verji sig ekki neitt heldur velti kostnaðinum bara út í verð­lagið á meðan evrópsku flug­fé­lögin eru al­mennt að verja sig tals­vert mikið.

„Okkar af­staða undan­farið hefur verið að við ætlum að verja okkur á sam­bæri­legan hátt og okkar helstu sam­keppnis­aðilar. Við viljum ekki vera í einni stöðu og síðan eru allir okkar helstu sam­keppnis­aðilar í ein­hverri allt annarri stöðu og svo fer verðið þeim í hag en ekki okkur,“ sagði Einar.

Einar tók eftir því að Davíð var ekki sáttur með svörin og spurði því hvort hann væri með „Follow up“ spurningu?

„Ég meina þetta er náttúru­lega bara stefnan ykkar og við hlut­hafar hljótum bara að hugsa það,“ sagði Davíð.

„Mér finnst á­huga­vert í rauninni þegar það nánast liggur fyrir, og það nokkurn veginn lá fyrir, að hefðu á­ætlanir gengið eftir á miðjum hluta ársins þá hefðuð þið getað læst inni hagnað á fyrir­tækið sem hefði verið frá­bært á þriðja ári. En þið á­kveðið að fylgja markaðnum, fylgja því sem ein­hverjir aðrir eru að gera, leyfið þeim að taka þannig á­kvarðanir fyrir ykkur og þið lendið þá í því að vera ekki með hagnað á tíma­bilinu,“ sagði Davíð sem í­trekaði þó að hann væri að vera vitur eftir á.

Einar Örn benti Davíð á að staðan og rekstrar­af­koman hefði ekki breyst mikið ef öll elds­neytis­notkun hefði verið varin og að það hefði boðið upp á fleiri hættur.

„Það er að­eins erfitt að segja hvað gerist. Hefðum við sagt í vor að við ætlum að verja alla á­ætlaða elds­neytis­notkun okkar út árið og svo hefði bara allt annað gerst eins og það gerðist þá hefði af­koman okkar verið ná­lægt núlli,“ sagði Einar.

„Teneferðir um jólin væru bara á nítján og níu“

Einar teiknaði síðan upp aðra sviðs­mynd þar sem fé­lagið hefði varið alla elds­neytis­notkun og síðan hefði olíu­verð lækkað til muna.