Novo Nordisk sendi frá sér jákvæða afkomuviðvörun í morgun vegna gríðarlegrar eftirspurnar eftir sykursýkis- og þyngdarstjórnunarlyfjunum Ozemipic og Wegovy.
Danska lyfjafyrirtækið greindi frá því að tekjur væru ofar væntingum á fyrsta fjórðungi en Novo seldi lyf fyrir 65 milljarða danskra króna eða 1.306 milljarða íslenskra króna. Mun það vera um 24% tekjuaukning á milli ára.
Hagnaður Novo Nordisk á fyrsta fjórðungi jókst einnig um 28% milli ára og nam 25 milljörðum danskra króna eða um 502 milljörðum íslenskra króna á gengi dagsins.
Samkvæmt afkomuspánni býst Novo Nordisk við því að tekjur munu aukast um 19% til 27% í ár í samanburði við árið 2023. Fyrirtækið býst einnig við því að rekstrarhagnaður muni aukast um 30%.
Samkvæmt Financial Times hefur Novo Nordisk verið að fjárfesta í að auka framleiðslugetu sína til að mæta gríðarlegri eftirspurn í Wegovy og Ozempic.
Enn eru vandræði í aðfangakeðjunni en félagið náði að auka framboð á Ozempic í janúar að nýju eftir að hafa þurft að hægja á framleiðslunni í maí í fyrra vegna vandamála í aðfangakeðjunni.
Samkvæmt fyrirtækinu fjölgar sjúklingum sem taka Wegovy um 25 þúsund í hverri viku í Bandaríkjunum.