Flugfélagssamstæðan IAG, sem heldur meðal annars utan um British Ariways, Iberia og Vueling, skilaði 68 milljóna evru rekstrarhagnaði á fyrsta ársfjórðungi sem er töluverð hækkun úr 9 milljónum evra árið áður.
Greiningaraðilar höfðu spáð að rekstrarhagnaður samstæðunnar yrði um 48 milljónir evra og er því afkoman töluvert yfir spám greiningaraðila.
Í uppgjöri IAG segir að flugfélagið búist við að aukin eftirspurn eftir ferðalögum muni haldast út árið.
Samkvæmt The Wall Street Journal búast evrópsku flugfélögin Lufthansa og Air France einnig við aukinni eftirspurn í ferðalögum í sumar.
Farþegafjöldi IAG jókst um 7% á fyrsta ársfjórðungi í samanburði við sama tímabil í fyrra.
Tekjur á hvern sætiskílómetra jukust um 4,4% á fjórðungnum á sama tíma og hliðartekjur af hverjum farþega jukust um 12%.
Hlutabréfaverð IAG hækkaði um 1,1% í fyrstu viðskiptum í morgun en gengi samsteypunnar hefur hækkað um 19% á árinu.